Албанскиот премиер Еди Рама денеска најави дека Самитот на НАТО во 2027 година ќе се одржи во Тирана.
Обраќајќи се на годишниот состанок, Рама зборуваше за бројни теми, меѓу кои и Самитот и меѓународните состаноци што ќе ги организира Албанија.
Рама рече дека Албанија е меѓународно почитувана и најави дека неговата земја ќе биде домаќин на Самитот на Европската политичка заедница на 16 мај 2025 година.
„Она што е уште поневеројатно е дека во 2027 година ќе бидеме домаќини на Самитот на НАТО во Тирана. Почнавме да работиме со НАТО на ова прашање“, рече Рама.
Тој истакна дека американскиот претседател ќе присуствува и на Самитот на НАТО што се планира да се одржи во Албанија.
„Доаѓањето на американскиот претседател и сите лидери на НАТО во Тирана е исто така многу јасна порака до сите за новата политичка позиција на Албанија на меѓународната сцена. Ние сме мала земја, со скромна тежина, но денес не третираат со повеќе почит од кога било досега во нашата историја“, рече Рама.
Тој рече дека Владата не се откажува од одлуката за забрана на кинеската платформа за социјални медиуми ТикТок во Албанија на најмалку една година.
Албанскиот премиер најави дека процесот на спроведување на забраната ќе започне во рок од шест до осум недели.
Осврнувајќи се на анкета на национално ниво за ова прашање, Рама додаде дека повеќе од 90 отсто од родителите ја поддржале забраната.
Албанската влада објави дека ТикТок ќе биде забранет во земјата најмалку една година откако во ноември, 14-годишниот Мартин Цани го загуби животот во напад со нож од друг ученик во основното училиште „Фан Ноли“ во Тирана. Расправијата на студентите наводно започнала на социјалните мрежи.
