Судот во Рим во понеделникот ја суспендираше одлуката на италијанската влада за префрлање на седум мигранти во албански прифатен центар, упатувајќи го случајот до Европскиот суд на правдата за мислење, со што го суспендираше одобрението за нивна депортација.
Кога за 48 часа ќе истече рокот за судска потврда на депортацијата, седум мигранти од Египет и Бангладеш ќе треба да го напуштат бегалскиот центар во Џадер, Албанија, а бродот Либера, кој ги превезе во Албанија, ќе треба да ги врати во Италија.
Осмиот мигрант веќе беше вратен во Италија минатата недела, откако беше прогласен за „ранлив“ од здравствени причини.
Пресудата претставува втора голема пречка за контроверзниот договор меѓу Италија и Албанија, чија цел е мигрантите спасени во Средоземното Море од италијанската крајбрежна стража да бидат префрлени во Албанија каде ќе се проверуваат нивните барања за азил.
Римските судии од имиграцискиот оддел минатиот месец го одбија префрлањето на првата група од 12 мигранти испратени во новоотворените албански центри, бидејќи нивните земји на потекло не се сметаа за доволно безбедни за репатријација.
Екстремно десничарската влада на Италија предводена од премиерката Џорџија Мелони потоа усвои нов декрет, со цел да се решат судските пречки за нејзиниот миграциски договор со Албанија.
Декретот го намали бројот на земји кои се сметаат за безбедни со закон, така што Рим може да ги испраќа мигрантите назад во тие земји користејќи брза процедура, во случај да не добијат азил според италијанскиот закон.
Со петгодишниот договор меѓу Рим и Тирана, Италија изгради два прифатни центри во Албанија, во Шенџин и Ѓадер, каде мигрантите ќе се процесуираат пред да се вратат во нивните земји или да бидат префрлени во Европската унија.
Центрите се под италијански надзор, а според договорот со Албанија, бројот на мигранти кои можат да останат во Албанија во еден момент не може да надмине 3.000.
Судот ја оспори оваа одлука, повикувајќи се на пресудата на Европскиот суд на правдата која вели дека само земјите чија цела територија е безбедна може да се сметаат за безбедни за мигрантите.
Во меѓувреме, мигрантите може да бидат процесуирани за евентуален азил во Италија или да бидат вратени назад во нивните земји доколку нивните барања бидат одбиени.
Мелони силно го промовираше договорот, велејќи дека тој може да стане нов модел за другите европски земји да се справат со зголемената илегална миграција.
Сепак, групите за човекови права и невладините организации активни на Медитеранот тврдат дека договорот ги загрозува човековите права и е во конфликт со меѓународните закони.
