Поранешниот премиер на Албанија, Сали Бериша изјави дека британските власти донеле одлука да му забранат влез во Велика Британија, „поради јасни врски со организирани криминални групи, криминалци и поради корупција“.
На конференција за медиуми од седиштето на Демократската партија на Албанија, Бериша рече дека причината му била соопштена поради „јасните врски со организирани криминални групи и криминалци кои претставуваат ризик за јавната безбедност во Албанија и Обединетото Кралство, како и поради корупција“.
Негирајќи ги обвинувањата, Бериша додаде дека иако во одлуката се наведува дека е доверлива, и иако британските претставници во Тирана изјавија дека нема да ги објавуваат имињата, тој донел одлука тоа да го сподели јавно за албанските граѓани.
„Оваа одлука е во пресрет на клеветите за интересите на истата група, која исто така ја спонзорираше одлуката на секретарот Блинкен (државен секретар на САД, Антони Блинкен), врз основа на клеветите и коруптивното лобирање на Еди Рама и мултимилијардерот Џорџ Сорос“, изјави Бериша.
Тој истакна дека „бил свесен за напорите на дипломатите на Стејт департментот да се приклучат на нивната одлука и меѓународните партнери, апсолутно без никаква основа, за да го зголемат притисокот врз него и да ја оправдаат нивната одлука врз основа на клевета“.
Бериша додаде дека ги поканува британските власти да им ги предадат на органите на правдата на нивната земја и на органите на правдата во Албанија „секој факт, доказ или документ што тие или кој било друг ги има“, за обвинувањата што ги покренаа против него.
Преку соопштение објавено на социјалните мрежи се огласи британската амбасада во Тирана. Тие објавија дека оваа недела Обединетото Кралство презеде превентивни активности против некои албански поединци за кои е документирано дека имаат врски со криминал и корупција.
Потсетуваме дека на 19 мај 2021 година, Амбасадата на САД во Албанија ја објави одлуката на американскиот државен секретар, Антони Блинкен, да го прогласи поранешниот премиер на Албанија, Сали Бериша, за непожелна личност за влез во САД поради „коруптивни дејствија и поткопување на демократијата во Албанија“.
Откако Бериша беше прогласен за „персона нон грата“ од САД, поранешниот претседател на Демократската партија (ДП), Љуљзим Баша, одлучи да го исклучи поранешниот премиер Бериша од пратеничката група на оваа партија, одлука што предизвика судир во ДП и создаде две групи во партијата.
