Ацо Мартиновиќ (45) од Цетиње, кој во средата на 1 јануари во тој град уби 12 лица и рани четворица, па се самоуби, во 2005 година бил осуден на условна казна за насилничко однесување.
Полицијата пред три години кај него забележала асоцијално однесување и бил побаран психијатриски преглед.
На Мартиновиќ тогаш му била препишана терапија во Здравствен дом, но не бил упатен во специјализирана здравствена установа, изјави вчера в.д. директорот на Црногорската полициска управа, Лазар Шќепановиќ.
Зборувајќи за профилот на масовниот убиец, Шќепановиќ рече дека Ацо Мартиновиќ се занимавал со поправка и бојадисување автомобили. Бил неженет, без деца и живеел сам.
Шќепановиќ додаде и дека, според официјалните податоци на Управата на полицијата, убиецот не се сметал за лице од оперативен интерес.
„Тој е евидентиран како сторител на кривично дело со елементи на насилство. Поточно, во 2005 година тој беше правосилно осуден за насилничко однесување, кога судот му ја замени тримесечната затворска казна со условна казна“.
Во текот на 2022 година, службеници на Управата на полицијата имале оперативни сознанија дека Мартиновиќ нелегално поседувал огнено оружје.
Според Шќепановиќ, полицијата на 28.11.2022 година извршила претрес во семејната куќа на Мартиновиќ при што пронашле две воздушни пушки, 43 парчиња куршуми од различен калибар, една поголема импровизирана експлозивна направа со голема разорна моќ и комплет за чистење на огнено оружје.
„За ова кривично дело неовластено држење оружје и експлозивни материи убиецот првостепено е осуден на тримесечна затворска казна, но таа казна не стана правосилна, бидејќи се води жалбена постапка во Вишиот суд во Подгорица“, рече Шќепановиќ.
Полицијата тогаш, како што вели, го препознала асоцијалното однесување на ова лице по извршениот претрес и разговор, па до Здравствениот дом Цетиње препратила барање за психијатриско вештачење, согласно Законот за заштита и остварување на правата на ментално болните.
„Ова лице веднаш по претресот е однесено во Министерството за здравство, каде според добиените информации му е препишана терапија во Здравствен дом и во таа прилика не е упатен во специјализирана здравствена установа“, заклучи Шќепановиќ.
