Првиот заеднички настап во светот на симфониски оркестар и робот кој свири виолончело се одржа во Шведска. Делото е создадено за роботот од шведскиот композитор Џејкоб Мулрад, кој рече дека можностите за роботска изведба го инспирирале да го преиспита виолончелото како инструмент.
Премиерата се одржа во Малме, Шведска, каде роботски виолончелист настапи заедно со симфониски оркестар.
Тие заедно го изведоа делото на Мулрад наречено „Вир“.
Композиторот (33) рече дека овој експеримент не е за замена на човечки музичари со робот, туку за стекнување нови сознанија за креативниот процес.
На пример, уникатната анатомија на роботските раце значи дека тие се способни да свират две ноти одеднаш што човечката рака не може, а овие нови можности го натераа Мулрад да размислува за виолончелото на сосема нов начин.
„Рацете на роботите имаат поинаква анатомска структура од човечкото тело и човечките раце, што секако ме тера да го гледам виолончелото на поинаков начин, бидејќи одеднаш има многу начини на свирење виолончело за кои не размислував порано поради ограничувањата на човекот и анатомијата. Така, благодарение на овој робот, виолончелото стана нов инструмент за мене“, вели Мулрад.
Роботот е толку прецизен што им конкурира на најуспешните човечки музичари.
Мулрад, всушност, првично си поигрувал со идејата да состави технички напредно парче што човечки музичар не може да го изведе.
Но тој сепак создаде бавна и едноставна мелодија за да ја покаже експресивноста на роботот.
Мулрад не мисли дека прецизноста на роботот води до недостаток на душа и креативност во изведбата и, како што се испостави, дури и робот е способен да прави грешки.
Синтетизираната музика би можела да произведе дела за виолончело кои ни робот не може да ги свири.
Но, за Мулрад, акустичната изведба со помош на физички објект има „магија“ со која синтетизираната музика никогаш не може да се совпадне - дури и ако музичарот е робот.
Композиторот беше задоволен од овој прв експеримент во Малме и вели дека бил добро прифатен и од публиката и од оркестарот.
Но имаше критики.
„Добив повратни информации од некои музичари кои беа малку исплашени, исто така и од социјалните мрежи - од луѓето што го преиспитуваат. Номислам дека е разумно да се преиспитуваат работите. Мислам дека секој може отворено да го преиспита. Го доведувам во прашање и тоа“, објаснува Мулрад.
Тој вели дека има повеќе планови да компонира музика за роботско виолончело и планира да настапи во САД за прв пат подоцна оваа година.
Работејќи со робот-програмер, тој планира во иднина роботот да свири на други инструменти, вклучувајќи ја и виолината.
