Италија сака да види дека земјите од Западен Балкан се приклучуваат на ЕУ пред 2030 година, смета италијанскиот министер за надворешни работи Антонио Тајани.
„Ние сме за да им се дозволи на сите земји да се приклучат пред 2030 година. Можеби на Босна и Херцеговина и треба повеќе време, но другите Србија, Црна Гора, Албанија, Северна Македонија се земји кои постигнаа напредок и мислам дека 2029 година е вистинското време“, изјави Тајани на министерскиот состанок на земјите од Западен Балкан денеска во Рим.
За Косово Тајани рече дека ЕУ работи на тоа да стави крај на тешкиот период, во кој секој треба да направи чекор напред.
“Правата на малцинствата мора да се почитуваат и се надевам дека тензијата што постои на границата меѓу Косово и Србија нема да продолжи“, изјави Тајани.
Повеќето земји-членки на ОН, вклучувајќи ги САД, Велика Британија, Франција, Германија и Туркије, го признаа Косово откако прогласи независност во 2008 година. Србија, сепак, продолжува да го гледа како своја територија.
Последните месеци се зголемија тензиите во северно Косово, област која се граничи со Србија со големо етничко српско население.
Високата претставничка на ЕУ за надворешна политика и безбедност Каја Калас истакна дека Западен Балкан е дел од европското семејство. Калас на социјалната мрежа Икс посочи дека во Рим укажала на заедничка безбедносна перспектива со Западен Балкан и изрази надеж дека во следните пет години ќе има вистински напредок во однос на проширувањето на ЕУ, врз основа на напредокот во реформите.
