Претседателот на Турската фудбалска федерација (ТФФ) Ибрахим Хачиосманоглу најави дека ќе биде ангажиран странски судија од „светска класа“ за претстојното истанбулско дерби меѓу Галатасарај и Фенербахче.
Хачиосманоглу повика на смирување на тензиите меѓу двата клуба од Истанбул во пресрет на дербито што ќе се одигра на 24 февруари во рамките на 25. коло од Трендиол Супер лигата.
„Од самиот почеток реков дека имаме многу домашни судии за вакви натпревари и им верувам. Рековме и дека ќе ги почитуваме позициите на клубовите и колегите од УО ме овластија да донесам одлука. Дербито ќе го суди странски судија од светска класа за да ги прекине дискусиите и да не ги турка нашите судии во тие дискусии“, рече Хаџиосманоглу.
Галатасарај влегува во следното дерби од челната позиција на табелата, со шест бода повеќе од најголемиот ривал Фенербахче.
Актуелниот турски шампион Галатасарај е критикуван дека е миленик на судиите, а такви критики упати и тренерот на Фенербахче, Жозе Мурињо, кој тврди дека во нормални околности неговиот тим би бил водечки на табелата.
Да потсетиме, во 23. коло фудбалерите на Адана Демирспор го напуштија теренот по половина час игра поради незадоволство од досуден пенал за Галатасарај.
Галатасарај ги освои последните две турски првенства, додека Фенербахче ја чека шампионската титула од 2014 година.
Сепак, расположението во соблекувалните во пресрет на дербито може донекаде да зависи и од натпреварите од УЕФА Лига Европа закажани за 20 февруари.
Галатасарај ќе биде домаќин на АЗ Алкмар во реваншот по тешкиот пораз од 4:1 на гостински терен, додека капитенот Един Џеко го води Фенербахче во Андерлехт по победата од 3:0 во првиот натпревар.
