Долгогодишната македонска ракометна репрезентативка, Индира Кастратовиќ, ќе биде вклучена во ракометната „Куќа на славните“ на ЕХФ, објави денеска европската куќа на ракометот, обелоденувајќи ја листата на најнови лауреати кои ќе бидат дел од ова елитно друштво.
Кастратовиќ најдобрите ракометни денови ги мина токму во Македонија, предводејќи го Кометал ЃП до историската титула во Лигата на Шампионите, а имаше и одлични настапи во дресот на нашиот национален тим, блескајќи на СП 1997 кога Македонија стигна до седмото место на мундијалот, а Индира беше најдобар стрелец на шампионатот со 71 постигнат гол.
Таа се наоѓа на листата од 21 нов член на ЕХФ (14 машки и седум женски), кои на денот на финалето на ЕП 2024, на 14 декември на гала-вечера ќе бидат примени во ова одбрано друштво.
Заедно со Кастратовиќ во куќата на славните ќе влезат и легендарните Никола Карабатиќ и Микел Хансен, потоа екс-голманката на Кометал ЃП, Луминица Дину, како и поранешното крило на Вардар, Иван Чупиќ.
Тие им се придружуваат на повеќе од 50 легенди кои беа први примени во „Куќата на славните“, наградени на инаугуративните награди за извонредност на ЕХФ во јуни 2023 година.
Кастратовиќ е втора ракометна личност од Македонија која е во елитното друштво, прв во „Куќата на славните“ влезе Кире Лазаров.
„Среќни сме што им оддаваме почит на легендите на нашата игра преку оваа церемонија. Ова е одлична можност да ги истакнеме нивните успеси и влијанието што го имаат врз спортот, на и надвор од теренот“, изјави претседателот на ЕХФ, Михаел Видерер.
Списокот на ракометари и ракометарки кои сега ќе се приклучат во „Куќата на славните“:
Список на легенди (мажи и жени) кои ќе влезат во „Куќата на славните“:
ГОЛМАНИ • Андреас Тиел / Германија • Матс Олсон / Шведска • Дејан Периќ / Србија • Луминица Хуцупан Дину / Романија
ЛЕВО КРИЛО • Герго Иванчик / Унгарија
ЛЕВИ БЕКОВИ • Никола Карабатиќ / Франција • Микел Хансен / Данска • Кармен Амариеи / Романија • Ања Андерсен / Данска
ЦЕНТРАЛНИ БЕКОВИ • Љубомир Врањеш / Шведска • Енди Шмид / Швајцарија • Миа Хермансон-Хогдал / Шведска • Стине Офтедал Дамке / Норвешка
ДЕСНИ БЕКОВИ • Фолкер Цербе / Германија • Стафан Олсон / Шведска • Индира Кастратовиќ / Македонија • Марта Манге / Шпанија
ДЕСНИ КРИЛА • Лук Абало / Франција • Иван Чупиќ / Хрватска
ПИКЕРИ • Игор Вори / Хрватска
ДЕФАНЗИВЦИ• Виран Морос / Шпанија
