Фудбалските репрезентации на Италија, Словенија и Чешка вчера се пласираа на Европското првенство кое следната година ќе се одржи во Германија.
Актуелниот европски првак Италија во Леверкузен во директна пресметка за пласман на ЕУРО 2024 одигра без голови против Украина (0:0), која формално беше домаќин на натпреварот.
Освоениот бод ѝ беше доволен на Италија за пласман на континенталното натпреварување каде ќе ја брани титулата освоена пред три години во Англија.
„Аѕурите“ имаа добра шанса во седмата минута кога Кјеза беше непрецизен, Фратеши можеше да постигне гол, додека Украинците ја имаа најубавата шанса во вториот дел, Мудрик шутираше, но Донарума одбрани.
Во истата група Северна Македонија и Англија одиграа нерешено во Скопје (1:1). Македонците поведоа со голот на Барди, а потоа Атанасов си постигна автогол. Англичаните претходно обезбедија пласман на ЕП.
Украина пласман на Европското првенство ќе бара преку баражот.
Италија најверојатно ќе биде сместена во последниот четврти шешир при ждрепката за групите на ЕП. За тоа да се случи, вечерва треба Хрватска да ја победи Ерменија.
Ако победат Хрватите, тие ќе бидат во третиот шешир, а Италија ќе се најде во четвртиот, заедно со Србија, Швајцарија или Романија, и трите тима кои ќе се пласираат на ЕП преку баражите.
За првите носители веќе нема дилеми, сите места се пополнети. Во првиот шешир ќе бидат домаќинот Германија, потоа Португалија, Франција, Шпанија, Белгија и Англија.
Словенија во Љубљана го победи Казахстан со 2:1 во уште еден директен натпревар за пласман на ЕП. Словенија по втор пат во историјата се пласираше на ЕП, а првпат учествуваше во 2000 година.
Словенците поведоа во 41. минута преку Шешко, Казахстан израмни во 48. стрелец беше Оразов, а конечниот резултат го постави Вербич во 86. минута.
Во истата група Северна Ирска со 2:0 славеше на домашен терен против лидерот Данска, која претходно обезбеди пласман на ЕП. Данците останаа првопласирани поради подобриот меѓусебен скор со Словенија, иако Словенците имаа подобра гол разлика.
Чесите на домашен терен ја победија Молдавија (3:0), а стрелци беа Дудера, Чори и Соучек.
Место за ЕВРО 2024 обезбедија Турција, Шпанија, Шкотска, Франција, Англија, Белгија, Австрија, Португалија, Унгарија, Словачка, Албанија, Данска, Чешка, Италија Словенија и домаќинот Германија.
Група Ц:
Северна Македонија - Англија: 1-1
Украина - Италија: 0-0
Група Е:
Албанија - Фарски Острови: 0-0
Чешка – Молдавија: 3-0
Група H:
Северна Ирска – Данска: 2-0
Сан Марино - Финска: 1-2
Словенија – Казахстан: 2-1
