Изборот на најдобрите фудбалери секогаш предизвикува огромно внимание. Но љубителите на фудбалот со внимание го следат и изборот на најдобрите стратези. На крајот на месецов најдобрите светски тренери ќе бидат во фокусот на европската спортска јавност. На 31 август во „Грималди Форум“ во Монте Карло ќе биде избран најдобриот тренер во Европа од страна на Европската фудбалска асоцијација (УЕФА)
Гвардиола, Инзаги или Спалети
Кандидати се Шпанецот Жосеп Гвардиола (Манчестер Сити) и Италијанците Симоне Инзаги (Интер) и Лучијано Спалети (Наполи).
Победникот ќе биде прогласен на церемонијата на ждрепката од групната фаза од Лигата на шампиони 2023/24. Тогаш ќе се знае и кој е најдобриот фудбалер и фудбалерка во Европа минатата сезона.
Меѓу тренерите од пошироката листа за наградата се најдоа: Роберто де Зерби (Брајтон - 70 поени), Микел Артета (Арсенал - 67), Златко Далиќ (Хрватска - 49), Хозе Луис Мендилибар (Севиља - 28), Дидие Дешамп (Франција – 26), Дејвид Мојс (Вест Хем – 22), Франк Хаиз (Ленс – 11).
Начин на избор
Првичниот скратен избор на тренери за престижната награда го одреди техничката студиска група на УЕФА. За тројцата најдобри кандидати гласаше жири составено од тренери на клубови кои играа во групната фаза на Лигата на шампионите на УЕФА во сезоната 2022/23, Лигата на Европа на УЕФА и Конференциската лига на УЕФА Европа, тренери на машките репрезентации на сојузите на членките на УЕФА и група новинари избрани од страна на Европските спортски медиуми (ESM).
„Од тренерите и новинарите е побарано да изберат тројца најдобри тренери од потесниот избор со тоа што ќе им доделат пет бода, три и еден бод. Конечниот резултат се базира на вкупниот број гласови на тренерите и новинарите. На тренерите не им е дозволено да гласаат за себе“, соопшти УЕФА.
УЕФА денес ги објави и тројцата кандидати за најдобар фудбалер кој настапувал на Стариот Континент во изминатата сезона. За трофејот за најдобар играч на УЕФА жирито ги номинира Белгиецот Кевин де Брујне, Норвежанецот Ерлинг Халанд и Аргентинецот Лионел Меси.
