Фудбалерите на Лил и Астон Вила направија големи изненадувања во натпреварите од 2. коло во Лигата на шампионите совладувајќи ги со по 1:0 Реал Мадрид и Баерн Минхен.
Актуелниот европски шампион Реал Мадрид го доживеа првиот пораз во последните 36 натпревари во сите натпреварувања, откако вчера загуби од Лил.
Иако „кралскиот клуб“ доминираше, решавачки беше голот на Џонатан Дејвид од пенал во судиското надополнување на првиот дел.
Први се заканија гостите, во 6. минута Винисиус имаше добра можност, но шутираше лошо. Во уште подобра ситуација се најде Ендрик во 19. минута, но домашниот голман Лукас Шевалие одлично реагираше. Лил возврати во 26. минута, Џонатан Дејвид шутираше со глава по центаршут, но Андриј Лунин одбрани. Топката се одби до напаѓачот на Лил кој повторно шутираше, но Лунин со помош на стативата уште еднаш го спаси голот на Реал.
Сепак, ниту Лунин не можеше да направи ништо во судиското продолжение. Едуардо Камавинга играше со рака во шеснаесетникот, но судијата Маурицио Маријани не реагираше. Сепак, по повикот од ВАР собата, тој го погледна видеото и ја промени својата одлука. Давид беше сигурен погодувајќи за 1:0.
Во продолжението од мечот Реал притисна, но Лукас Шевалие брилијантно бранеше.
Во 3. коло, Реал на 22 октомври ја пречекува Борусија Дортмунд, а Лил ден подоцна ќе гостува кај Атлетико Мадрид, кој вчера претрпе тежок пораз во Лисабон од Бенфика.
Изненадување направи и Астон Вила совладувајќи го Баерн Минхен со 1:0. Решавачкиот гол го постигна Џон Дуран во 79. минута.
Баварците доминираа, но не можеа да го пробијат одличниот аргентински голман Емилијано Мартинез. Решавачкиот гол беше постигнат во 79. минута. Пау Торес испрати долга топка до Дуран. кој го искористи невниманието на Мануел Нојер кој излезе од неговиот гол и погоди за 1:0.
Во 3. коло Баварците гостуваат кај Барселона, Астон Вила повторно ќе игра на домашен терен против Болоња.
Ливерпул славеше против Болоња со 2-0 забележувајќи ја втората победа.
Болоња прва се закани и веднаш постигна гол. Во деветтата минута Тијс Далинга го совлада Алисон, но голот беше поништен поради офсајд. Само две минути подоцна „црвените“ поведоа. Мохамед Салах нафрли во шеснаесетникот, а Алексис Мек Алистер погоди за 1:0.
До крајот на полувремето Болоња имаше неколку добри прилики за израмнување. Во 32. минута Дан Ндоје ја погоди стативата, а две минути подоцна одлично шутираше Урбански, но Алисон беше подготвен.
Ливерпул ја потврди победата во 75. минута со голот на Мохамед Салах.
Јувентус во одличен натпревар во Германија го победи РБ Лајпциг со 2:3, иако губеше со 1:0 и 2-1.
Домашните поведоа во 30. минута. Тоа беше одлична контра на домаќините. Лоис Опенда го повлече нападот и му асистираше на Шешко, кој со одличен удар ја испрати топката под гредата. Израмни Влаховиќ во 50. минута, но само четири минути подоцна германскиот тим беше на неколку сантиметри од ново водство. Опенда шутираше од работ на шеснаесетникот и ја погоди стативата.
Јувентус остана со играч помалку во 58. минута по играњето со рака на голманот Микеле ди Грегорио надвор од шеснаесетникот. Слободниот удар го изведе Опенда, топката удри во раката на Бремер, а судијата по ВАР асистенција досуди пенал кој го реализираше Шешко. Јуве се врати само четири минути подоцна, Влаховиќ со својот втор гол извонредно погоди за 2:2.
Во 70. минута Опенда по вторпат на натпреварот ја погоди стативата, а решавачкиот момент се случи во 83. минута кога Консеисао мина двајца играчи во одбраната на домаќините и постигна убав гол за 2:3.
По поразот од Баерн со 9:2 во првото коло, Динамо вчера во Загреб одигра одличен натпревар против Монако. Доминираше и поведе со 2:0, а потоа со две грешки на крајот им дозволи на Французите да избегнат пораз.
Динамо поведе со атрактивниот гол на Сучиќ (45+3) на асистенција на Батурина, кој со фантастичен соло продор во 66. минута зголеми на 2:0. Монако го намали резултатот преку Салису по големата грешка на голманот Иван Невистиќ, а во 90. минута Швајцарецот Денис Закарија израмни од пенал.
Бенфика во Лисабон го декласираше Атлетико Мадрид со 4:0.
Керем Актуртоглу во 13. минута го доведе португалскиот тим во водство. На почетокот од продолжението Бенфика го зголеми водството. Конор Галагер го собори Вангелис Павлидис, судијата покажа на белата точка по проверката на ВАР, а Анхел Ди Марија погоди за 2-0.
Фантастичниот настап на португалскиот клуб го продолжи Александар Бах по корнер во 75. минута за 3:0, а Оркун Кокча од пенал во 84. минута ги постави конечните 4:0.
Белгискиот клуб Бриж го совлада Штурм на гости со 1-0.
Птретходно вчера се одиграа натпреварите Шахтјор-Аталанта 0:3 и Жирона- Фејнорд 2:3.
