Ѕвездите на Баерн, Џамал Мусијала и Лирој Сане се неизвесни за првиот полуфинален натпревар од Лигата на шампионите, во кој Баварците во Минхен ќе го пречекаат Реал Мадрид, вечерва во 21 часот.
„Има неколку одлуки кои ќе ги донесеме во последен момент, како на пример со Џамал и Лирој“, изјави тренерот на Баерн, Томас Тухел на прес-конференција во понеделникот.
Мусијала чувствува болка во коленото, а проблемот на Сане се болки во препоните. Тухел најави дека ќе донесе одлука за нивниот настап по последниот тренинг пред натпреварот.
Нешто подобри се изгледите за настап на Конрад Лајмер, кој беше заменет на саботниот меч со Ајнтрахт поради повреда на скочниот зглоб, но ситуацијата не ветува и за двајцата стопери, Дајот Упамекан, кој исто така го повреди скочниот зглоб и Матијс де Лихт, кој страда од болки во коленото.
Тухел веќе најави дека на располагање ќе го има Серж Гнабри, кој последниот настап го имаше пред три недели, на првиот четвртфинален натпревар од Лигата на шампионите против Арсенал.
Баерн и Реал Мадрид одиграле вкупно 26 натпревари низ историјата на Лигата на шампионите и Купот на шампионите, што ги прави рекордери на ова натпреварување кога се во прашање меѓусебните дуели.
„Ова полуфинале се чувствува како финале. Тоа секако е многу важен дуел, меч со големо влијание“, додаде Тухел, за кого Лигата на шампионите е последното натпреварување во кое има можност да остави значаен белег на неговата мандат на клупата на Баерн, која ќе ја напушти на крајот од сезоната.
Под негово водство Баварците ја загубија трката со Баер за шампионската титула на Германија, која од 2013 година ја освојуваа 11 пати по ред.
Од друга страна, Реал Мадрид е речиси сигурно новиот шампион на Шпанија, а со исфрлањето на бранителот на титулата Манчестер Сити во четврт-финалето, „кралскиот клуб“ повторно е на дофат на пехарот „со големи уши“, кој мадридскиот тим го освои рекордни 14 пати.
Овие два тима не се сретнале во последните шест години во Лигата на шампионите, а поновата историја на нивните дуели е убедливо на страната на мадридскиот клуб. Последен пат Баерн успеа да го исфрли Реал во нокаут фазата од Лигата на шампионите пред 12 години, кога Тони Крос се уште го носеше дресот на Баварците.
Сепак, откако Лука Модриќ пристигна на „Сантијаго Бернабеу“, Реал стана непремостлива пречка за Баерн. Преку Баерн, Мадрид стигна до финалето во 2018 и 2014 година, а во 2017 година ги исфрли Баварците во четврт-финалето. На сите овие средби Реал победи на Алијанц Арената. Последен пат Баерн пред своите навивачи го совлада Реал во полуфиналето во 2012 година (2:1), а потоа во реваншот успеа да стигне до финалето по победата на пенали.
Реваншот е закажан за среда на 8 мај во Мадрид.
Утре се игра второто полуфинале на ЛШ, ПСЖ во Париз е домаќин на Борусија Дортмунд.
