Актуелниот европски шампион Реал Мадрид го продолжи патот кон одбрана на титулата откако го елиминира Манчестер Сити во плеј-офот со вкупни 6:3.
По победата со 2:3 во Манчестер, Реал на свој терен го совлада Сити со 3:1.
Тоа беше четврта последователна сезона во која Реал и Сити се сретнаа во нокаут фазата од Лигата на шампионите и трето славје за Шпанците.
Лани Реал славеше во четвртфиналето, пред две години Сити во полуфиналето, а во 2022 година Реал беше подобар во полуфиналето.
Реал поведе уште во 5.минута со голот на Мбапе. Французинот ја искористи долгата топка на Асенсио од половината на Реал и несмасноста на Диас, кој се лизна додека го чуваше Мбапе, а напаѓачот на Реал лесно со лоб удар погоди за 1:0.
Лошиот старт на Сити продолжи во 12.минута кога Пеп Гвардиола мораше веднаш да го замени повредениот Стоунс.
Французинот го постигна вториот гол во 35. минута. Винисиус се проби на десната страна и му ја додаде топката на Родриго, кој му асистираше на Мбапе, кој го издрибла Гвардиол и погоди покрај немоќниот Едерсон.
Третиот гол на натпреварот го постигна Мбапе во 61. минута со удар од работ на шеснаесетникот.
Фудбалерот на Сити Омар Мармус во 90+1. минута од слободен удар ја погоди гредата, а одбиената топка Нико Гонзалес ја уфрли во голот.
Ждрепката за осминафиналето ќе се одржи во петок во Нион, а потенцијални противници на Реал се градскиот ривал Атлетико или Баер Леверкузен.
Пари Сен Жермен рутински ја заврши плеј-оф рундата, совладувајќи го Брест со вкупни 10:0.
ПСЖ победи со 0:3 на гости, а беше уште поубедлив на „Паркот на принцовите“ победувајќи со 7:0.
За парискиот тим погодија Баркола (20), Кваратшхелија (39), Витиња (59), Дезир Дуе (64), Нуно Мендес (69), Гонкало Рамос (76) и Сени Мајулу (86).
ПСВ Ајндховен го победи Јувентус со 3:1 по дополнителните 30 минути, откако во регуларниот дел од мечот заврши 2:1, резултат со кој тимот од Торино славеше на домашен терен.
По првото полувреме во Ајндховен немаше голови. Сепак, во второто полувреме се случија многу возбудувања.
ПСВ поведе со голот на Иван Перишиќ во 53 минута, а Јувентус возврати 10 минути подоцна кога Тимоти Веа израмни на 1:1.
Возбудувањата продолжија со погодокот на Саибари во 74 минута, по асистенцијата на Перишиќ, за водство на ПСВ од 2:1, резултат идентичен од првата средба кој остана до крајот, па се играа дополнителни 30 минути.
Решавачкиот гол го постигна Фламинго во 98. минута. Бакајоко се проби по десната страна, а по збрката во гостинската одбрана, Фламинго немаше тешка задача да ја испрати топката во мрежата.
Од друга страна, Јувентус можеше да се врати во „живот“, откако Влаховиќ ја погоди стативата.
До крајот на натпреварот гостите не усепаја да се заканат, па го завршија натпреварувањето во ЛШ.
Фудбалерите на Борусија Дортмунд по убедливата победа од 0:3 во Лисабон одиграа само реми во реваншот против Спортинг, што беше доволно за пласман во осинафиналето на ЛШ.
Најголемата шанса Борусија ја имаше во првото полувреме во 27. минута. Сабицер извонредно шутираше од врвот на шеснаесетникот, но Руи Силва со последен обид го спаси голот.
Второто полувреме започна со добриот удар на Адејеми кој многу брзо потоа изнуди пенал за домашните. Голманот на гостите Руи Силва го фаулираше, но потоа се искупи за грешката така што го одбрани пеналот на Гуираси во 59. минута.
Во 73. минута конечно се затресе мрежата на гостите. Емре Џан постигна гол, но шутираше од офсајд. Домашниот тим продолжи да напаѓа до крајот, но натпреварот заврши без голови.
Во осминафиналето Борусија ќе игра против Лил или Астон Вила.
