Јапонија денеска го одржува државниот погреб во чест на поранешниот премиер Шинзо Абе, кој беше убиен во јули за време на изборната кампања.
Одлуката за одржување на државен погреб предизвика протести околу паркот во близина на салата Нипон Будокан во Токио, каде што над 700 странски државници и голем број локални жители му оддаваат почит на поранешниот лидер на владејачката Либерално-демократска партија, познат по стабилизирање на јапонската политичка сцена.
Церемонијата започна откако кремираните останки на Абе пристигнаа на местото и беа предадени на премиерот Фумио Кишида од страна на вдовицата на убиениот премиер Абе. На церемонијата е присутен и јапонскиот престолонаследник Акишино, кој го претставува царското семејство на земјата.
Краток документарец кој го прикажува животот и работата на Абе како поранешен лидер на Јапонија, беше емитуван кратко откако беше пуштена националната химна на земјата.
„Иднината на Јапонија зависи од тоа што го правиме сега“, беа само некои од цитатите од говорите на Абе кои беа пуштани за време на церемонијата.
Одлуката за одржување на државната церемонија во земјата се критикуваше бидејќи е донесена без собраниска расправа и поради трошоците.
Поради тоа, граѓаните одржаа протести на денот на церемонијата.
Демонстрантите кои одржаа марш до квартот Куданшита во областа Чијода во главниот град, каде што ќе се одржи церемонијата, извикуваа слогани „не за државната церемонија“.
Полициските службеници презедоа опсежни безбедносни мерки за демонстрациите во близина на паркот Кита-но-мару, кој е опкружен со реки и камени градби, северно од Царската палата.
И покрај протестите, Кишида го бранеше одржувањето на погребот.
„Господине Абе, вие бевте личност која требаше да живее многу, многу подолго како компас за иднината на Јапонија и светот“, рече Кишида на церемонијата.
„Веќе не можеме да те гледаме на дело...тоа е срцепарателно и за жалење“, додаде Кишида.
Поради протестите, Токио е во состојба на готовност со околу 20.000 полицајци кои го обезбедуваат местото на одржување на погребот.
Американската потпретседателка Камала Харис, индискиот премиер Нарендра Моди, турскиот министер за надворешни работи Мевлут Чавушоглу и претседателот на Меѓународниот олимписки комитет Томас Бах се меѓу странските гости кои присуствуваа на погребот.
Настанот се очекува да чини околу 1,66 милијарди јени (11,6 милиони долари) платени од парите на даночните обврзници и доби огромни критики од јавноста и политичарите.
Абе е премиер со најдолг стаж на Јапонија, кој беше убиен на 8 јули додека држеше говор за изборната кампања во западниот град Нара.
Ова е прв пат во последните 55 години Јапонија да почести некој од своите лидери со државен погреб.
Државните погреби се резервирани само за членовите на јапонското царско семејство.
Од Втората светска војна, само еден политичар ја доби оваа чест во 1967 година. Тој беше Јошида Шигеру кој беше премиер на Јапонија седум години во два мандати - од 1946 до 1954 година - и преговараше за крајот на американската окупација и враќањето на независноста на Јапонија.
