Палестински извори објавија дека Хамас прифатил план кој предвидува три фази на размена на затвореници и прекин на огнот во Појасот Газа, секоја во траење од 45 дена.
Во изјава за Анадолу, палестински извори наведоа детали за одговорот на Хамас на понудата за размена на затвореници и прекин на огнот во врска со „рамковниот договор“.
Извори велат дека Хамас ја прифатил понудата и подготвил дополнителен нацрт, кој ќе биде дел од рамковниот договор. Хамас го прифати планот кој предвидува три фази на размена на затвореници и прекин на огнот во Газа, од кои секоја ќе трае 45 дена.
Палестински извори откриваат дека првата фаза од договорот вклучува ослободување на жените, децата и постарите лица од двете страни и дека бројот на возила за хуманитарна помош што влегуваат во Појасот Газа во текот на првата фаза е побарано да биде не помал од 500 по ден.
Во првата фаза од договорот е побарано целосно укинување на ограничувањата за враќање на раселените лица во Појасот Газа.
„Првата фаза од планот вклучува и повлекување на израелските сили од населбите во сите региони на Појасот Газа“.
Хамас побара во првата фаза да бидат ставени во функција болниците во Газа, како и да се поправат болниците оштетени во нападите.
„Во втората фаза од планот, од Израел се бара да ослободи дел од палестинските затвореници во замена за ослободување на израелските воени затвореници кои Хамас ги држи во Газа во рок од 45 дена. Во втората фаза Хамас бара целосно повлекување на израелските сили од Газа“, се додава.
Размената на телата меѓу двете страни се очекува во рок од 45 дена, што е трета фаза од планот, а извори откриваат дека процесот вклучува и одржување преговори за „конечниот крај на војната“.
Со споменатиот план Хамас предвиде дека преговорите кои започнаа во првата фаза ќе завршат во втората фаза за целосно да се стави крај на војната.
Палестински извори објавија дека Хамас во анексот детализирал кои затвореници ќе бидат ослободени во секоја фаза и побарал ослободување на сите палестински затвореници уапсени од 7 октомври.
Хамас вчера објави дека својот одговор на рамковниот договор го испратил до Египет и Катар.
Во соопштението, во кое се истакнува дека Хамас го доставил својот одговор по консултации со палестинските групи, се наведува дека Хамас „ја поздравува понудата бидејќи гарантира целосен и сеопфатен прекин на огнот, завршува со нападите врз палестинскиот народ, ја укинува блокадата на Појасот Газа, гарантира обнова и го комплетира процесот на размена на затвореници“.
