Претседателот на либанскиот Парламент, Наби Бери, денес го одреди 9 јануари како датум за одржување на парламентарната седница за избор на претседател.
Претседателското место во Либан е празно повеќе од две години во услови на политички ќор-сокак на земјата и едногодишните израелски напади врз Либан.
Според државната новинска агенција ННА, Бери го соопштил ова за време на денешната парламентарна седница, велејќи дека ќе даде „едномесечен период за да се постигне консензус меѓу нас“.
Претседателот на либанското Собрание истакна дека ќе покани странски амбасадори да присуствуваат на седницата за избор на претседател.
Пратениците досега одржаа најмалку 12 седници, но не успеаја да изберат нов претседател што ќе го наследи Мишел Аун, кој ја напушти функцијата на 31 октомври 2022 година.
На кандидатот за претседател му се потребни две третини од гласовите, или 86 пратеници, за да ја помине првата фаза. Потребно е апсолутно мнозинство во следните кругови.
Најавата на Бери дојде еден ден по стапувањето во сила на договорот за прекин на огнот меѓу Либан и Израел вчера, со кој завршија над 14-месечните борби меѓу израелската Армија и групата Хезболах.
Над 3.800 луѓе се убиени во израелските напади во Либан, а над 1 милион се раселени од октомври минатата година, според податоците на либанските здравствени власти.
