„Конфликтите не се решаваат со оружје и закани туку со дијалог“, порача папата Франциск на седмиот Конгрес на лидерите на светските и традиционалните религии кој се одржува во Нур Султан, главниот град на Казахстан.
На конгресот, кој се одржа во Палатата на независноста, покрај поглаварот на Римокатоличката црква, папата Франциск, учествуваат државници од 50 земји и големиот имам на Универзитетот Ал-Азхар во Каиро, Ахмед ал Тајеб и главниот рабин на Ашкенази на Израел, Дејвид Лау.
Домаќинот на конгресот, казахстанскиот претседател Касим-Жомарт Токаев, на свеченото отворање изјави дека конгресот, кој започна во 2003 година на иницијатива на Казахстан, стана форум за дијалог меѓу цивилизациите на глобално ниво.
Посочувајќи дека повеќе од 100 различни етнички групи живеат хармонично во Казахстан, Токаев рече дека во земјата функционираат околу 4.000 различни верски организации.
Поглаварот на Римокатоличката црква, папата Франциск, порача дека конфликтите не треба да се решаваат со оружје и закани, туку со дијалог и трпеливи преговори.
„Да инвестираме во образованието, а не во вооружувањето. Да се ослободиме од редуктивни и деструктивни сфаќања кои го навредуваат Божјото име“, нагласи Папата.
Ел Тајеб повика на зајакнување на „социјалните врски меѓу религиите и почитувањето меѓу луѓето“.
На дводневниот конгрес, учесниците ќе се фокусираат на улогата на верските водачи во светот по пандемијата на коронавирус. Конгресот се одржува на секои три години во главниот град на Казахстан.
