Иницијативите на францускиот претседател Емануел Макрон кои вклучуваат мировни преговори за Украина се спротивни на она што Европа го повика на конференцијата во Минхен, изјави денеска словачкиот претседател Петер Пелегрини.
„Европа, по острите изјави од САД, откако виде дека прво ќе се одржат мировни преговори меѓу САД и Русија, дури и без Украина, повика на единство и здружување на силите во потрагата по конкретна европска позиција за ова прашање“, рече Пелегрини.
Според него, „невообичаениот“ пристап на Макрон е токму спротивен на тој апел и ја „распарчува“ Европската унија.
„Прво, самит на кој присуствуваа само неколку избрани земји заедно со Велика Британија, сега уште еден самит што треба да се одржи денеска, со друга група земји... Не разбирам зошто Унгарија и Словачка ги нема, иако ние сме непосредни соседи на земјата во конфликт“, посочи Пелегрини.
Тој вели дека дури и не разбира како земја која граничи со земја во која е во тек воен конфликт не може да биде поканета на самит за иднината на Украина и повоеното решавање на ситуацијата.
Како што заклучи, постапките на францускиот претседател не придонесуваат за единство.
Франција попладнево со почеток во 16 часот ќе биде домаќин на вториот самит за Украина и европската безбедност со поширока група сојузници.
Самитот ќе се одржи во хибриден формат, на кој ќе се приклучат неколку претставници на држави преку видео повик.
На набрзина свиканиот самит за понеделник присуствуваа лидерите на Франција, Велика Британија, Германија, Холандија, Данска, Шпанија, Италија и Полска, како и шефовите на институциите на ЕУ и НАТО.
