Полска соопшти дека ќе распореди уште 2.000 војници на границата со Белорусија наместо 1.000 како што беше најавено во понеделникот, пренесува Анадолу.
Не 1.000, туку 2.000 војници ќе одат на границата за да ја поддржат работата на Граничната стража, државната безбедносна агенција на Полска, рече заменик-министерот за внатрешни работи Мачеј Васик за време на интервјуто за државната новинска агенција ПАП.
Тој рече дека во согласност со одлуката донесена од Комитетот за безбедност, војниците ќе пристигнат до границата во следните две недели.
Во понеделникот, Граничната стража повика на распоредување на уште 1.000 војници на границата со Белорусија поради зголемените стравувања дека белоруските власти би можеле да се обидат да ги турнат мигрантите преку границата како повторување на миграциската криза од 2021 година, во која стотици луѓе се обидоа да преминат во Полска.
Васик, исто така, ја обвини Белорусија дека организира уште еден миграциски прилив во ЕУ преку полската граница.
Во летото 2021 година десетици илјади мигранти и бегалци преминаа или се обидоа да преминат во Полска од соседна Белорусија.
