Поддржувачите на Украина ќе ги искористат неочекуваните профити од замрзнатиот руски имот за финансирање на купување оружје за Киев, изјави денеска германскиот канцелар Олаф Шолц по состанокот со францускиот претседател Емануел Макрон и полскиот премиер Доналд Туск во Берлин.
На заедничката прес-конференција Шолц, Макрон и Туск ја потврдија својата поддршка за Украина, чии трупи имаат недостаток од муниција и се соочуваат со нивните најтешки битки од раните денови на руската инвазија пред две години.
Шолц рече дека лидерите се согласиле за потребата да се набави повеќе оружје за Украина на глобалниот пазар и да се зајакне производството на воена опрема, вклучително и преку соработка со партнерите во Украина.
И претседателката на Европската комисија Урсула фон дер Лајен минатиот месец ја повика ЕУ да размисли за користење на таквите профити за заедничко купување воена опрема за Украина.
Шолц рече дека лидерите се согласиле и за потребата од Контакт групата за одбрана на Украина предводена од САД од околу 50 земји кои обезбедуваат воена поддршка на Украина да формираат коалиција за обезбедување артилерија со долг дострел за украинската армија.
Макрон го повтори своето предупредување дека не е загрозена само украинската, туку и европската безбедност.
„Ќе направиме се што е потребно онолку долго колку што е потребно за Русија да не може да победи во оваа војна“, рече Макрон. „Оваа определба е цврста и подразбира наше единство.
Тој додаде дека тројцата лидери се согласиле за потребата да се зајакне поддршката за Молдавија, која вели дека Русија се обидува да ја дестабилизира преку хибридна војна.
