Германскиот канцелар Олаф Шолц пристигна денеска во ненадејна посета на Украина за прв пат по повеќе од две и пол години и веднаш по неговото пристигнување најави дека ќе го информира претседателот на Украина Володимир Зеленски за пакет воена помош во износ од 650 милиони евра.
Во исто време, портпаролот на германското Министерство за одбрана, Митко Милер, на брифинг во Берлин изјави дека воената помош од 650 милиони евра што Шолц ја најави по пристигнувањето во Киев е дел од голем пакет вреден 1,4 милијарди евра, ветен уште во октомври.
Тој наведе дека пакетот помош ќе вклучува опрема за противвоздушна одбрана, на пример, преносни системи МАНПАДС, ИРИС-Т СЛС и СЛМ, оклопни возила, како тенкови Леопард 1, БМП, извидувачки дронови, зимска опрема, топлински генератори и друго.
Милер потсети дека се развиени вкупно околу 50 проекти за воена помош на Украина, кои треба да бидат реализирани до крајот на годинава.
Според него, испораките се одвиваат брзо овие месеци.
Посетата на Шолц на Украина дојде само неколку недели откако Зеленски го критикуваше за неговиот телефонски разговор со рускиот претседател Владимир Путин.
Зеленски во петокот ненадејно сигнализираше дека кандидатурата за членство во НАТО за територијата контролирана од Киев може да стави крај на „жешката фаза од војната“ во Украина.
Шолц ја посети Украина пред предвремените германски избори кои се очекуваат во февруари.
На почетокот на кампањата, Шолц укажа на статусот на Германија како втор најголем снабдувач на оружје за Украина, а исто така ја истакна својата „претпазливост“ во работењето за спречување на ескалација на војната и одбивање да испорача крстосувачки ракети со долг дострел Таурус.
Во последните месеци тој ја истакна важноста да се најде пат кон мирот, нагласувајќи дека не смее да биде избран на сметка на Украина.
Кремљ, пак, во понеделникот негираше дека испратил порака до Украина преку германскиот канцелар Олаф Шолц.
Говорејќи пред новинарите портпаролот на Кремљ, Дмитриј Песков, рече дека Русија нема „очекувања“ од посетата на Шолц на Киев, но внимателно ги следи сите контакти.
Песков истакна дека додека Германија ја продолжува својата политика на „безусловна поддршка“ за Украина, Москва го оцени со „задоволство“ неодамнешниот телефонски разговор меѓу Шолц и Путин.
„Дијалогот, се разбира, секогаш е позитивен развој“, рече Песков.
Германскиот канцелар Шолц допатува во ненајавена посета на Киев, втор пат од почетокот на украинската војна. Тој претходно ја посети Украина заедно со францускиот и романскиот претседател и тогашниот премиер на Италија во јуни 2022 година.
