Генералниот секретар на Советот на Европа Ален Берсет денеска ја потврди својата посветеност за поддршка на Украина. Забелешките на Берсет уследија по неговата средба со украинскиот претседател Володимир Зеленски во Киев.
„Советот на Европа останува цврсто посветен на поддршката на Украина во нејзината борба за слобода и европска и демократска иднина“, објави Берсет на X.
Берсет наведе дека Зеленски рекол дека поддршката на Советот на Европа е клучна за обезбедување одговорност и компензација.
Зеленски го изрази своето задоволство од поддршката на Советот на Европа на Киев.
„Разговаравме за потребата од формирање Специјален суд за кривично дело агресија, бидејќи од клучно значење е руските воени злосторници да бидат повикани на одговорност“, напиша тој на X.
Украинскиот претседател изјави дека уште едно клучно прашање е ослободувањето на затворениците и враќањето на украинските деца илегално депортирани од Русија.
“Високо ја цениме улогата на Советот на Европа во воспоставувањето на Регистарот на штети како дел од Меѓународниот механизам за компензација“, рече украинскиот претседател.
Тој додаде дека Украина со нетрпение го очекува формирањето на Комисијата за штети и Фондот за компензација и смета на раководството на Советот во овој процес.
Организацијата основана за заштита на човековите права и владеењето на правото во Европа брои 46 членови. Русија се повлече од неа во март 2022 година.
