Франција и Полска денеска изразија заедничка цел да се постигне единство во Европа и мир во Украина.
„Имаме заедничка визија дека единствениот можен мир е траен мир, што значи мир за кој ќе преговараат Украинците и што ќе им овозможи да имаат долгорочни безбедносни решенија. Нема мир во Украина без Украинци, што значи дека никој не може да разговара за Украинците, во нивно име. На Украинците е да го направат тоа. Исто така, нема безбедност во Европа без Европејци“, рече францускиот претседател Емануел Макрон на заедничката прес-конференција со полскиот премиер Доналд Туск во Варшава.
Макрон ѝ се заблагодари на Полска за нејзините напори да го поддржи Киев за време на војната.
Туск им се заблагодари на Макрон и Франција и ја истакна потребата за јасна визија за иднината на Европа и нејзиното соседство.
Премиерот го поздрави напредокот што Полска го постигна заедно со нордиските и балтичките земји во нивните напори да донесат решение за војната во Украина.
„По дискусиите, ја забележуваме потребата од апсолутно единство во Европа за да дејствуваме во корист на мирот во Украина“, изјави Туск.
Тој нагласи дека Полска е земјата која го носи најголемиот товар во врска со војната во Украина, вклучително и воена и финансиска поддршка.
„Полска е таа која е домаќин на логистичкиот центар, единствен во својот жанр, кој служи за пренос на помош во Украина. Ние сме тие што го носат товарот на безбедноста на источната граница на Европската унија“, рече Туск.
