Фокс Њуз е првата голема медиумска мрежа од САД која практично го прогласи Доналд Трамп за победник на претседателските избори како кандидат на Републиканската партија.
„Ова е величествена победа за американскиот народ која ќе ни овозможи повторно да ја направиме Америка голема“, истакна Трамп во својот победнички говор
Според засега официјалните податоци Трамп освои 267 електорски гласови и му требаат уште најмалку три за да го осигура местото во Белата куќа. Ова ќе биде втор мандат за 78 годишниот бизнисмен, кој претходно победи против Хилари Клинтон во 2016 година, но изгуби од демократот Џо Бајден во 2020 година.
Тимот на изборната кампања на Доналд Трамп веќе ја прогласи и прослави победата од седиштето во Флорида, додека пак демократската кандидатка Камала Харис одлучи да не се обрати пред нејзините поддржувачи со седиштето во Вашингтон.
Трамп успеа да победи во сојузната држава Џорџија која на претходните избори беше меѓу клучните битки каде пресвертот го направи Џо Бајден. Републиканците се на пат да ја вратат и сојузната држава Аризона која исто така на претходните избори се одлучи за Џо Бајден.
Во останатите „неодлучни“ сојузни држави Трамп издвојува решавачка победа во Пенсилванија која беше меѓу најпосетуваните места во последните денови од изборната кампања и каде беа потрошени огромни пари за митинзи, спотови и регистрација на гласачи.
