Високиот претставник на Обединетите нации за човекови права, Волкер Турк, истакна дека Резолуцијата за геноцидот во Сребреница претставува дополнително признавање на жртвите и преживеаните и нивната желба за правда, вистина и гаранција за неповторување. .
Високиот претставник на Обединетите нацииза човекови права Волкер Турк ја поздрави Резолуцијата за геноцидот во Сребреница усвоена од Генералното собрание на ОН (ОНГА).
„Оваа Резолуција е дополнително признание за жртвите и преживеаните и нивната желба за правда, вистина и гаранција за неповторување. Ова е исто така важен чекор кон промовирање на културата на меморија и мир во Босна и Херцеговина, но и во регионот“, се вели во соопштението на Турк.
„Резолуцијата е уште поважна со оглед на постојаниот ревизионизам, негирањето на геноцидот во Сребреница и говорот на омраза од страна на високи политички лидери во Босна и Херцеговина, како и во соседните земји. Последните недели покажаа колку е итно да се соочиме со минатото во Босна и Херцеговина и на Западен Балкан“, рече тој.
Турк истакна дека политичките лидери во регионот имаат одговорност да се вклучат во конструктивен дијалог за изградба на мирни општества каде луѓето ќе можат да живеат безбедно и слободно, без дискриминација или страв од конфликти и насилство.
Тој нагласи дека силно се противи на негирањето на геноцидот извршен во јули 1995 година во Сребреница и на воените злосторства и злосторствата против човештвото.
Генералното собрание на Обединетите нации денеска ја усвои Резолуцијата за геноцидот во Сребреница.
За Резолуцијата гласаа 84 земји, 19 беа против, 68 беа воздржани.
Повеќето земји-членки на ОН одлучија 11 јули секоја година да се одбележува како Меѓународен ден на сеќавање на геноцидот во Сребреница.
