Најмалку 107 луѓе, претежно жени и деца, загинаа денеска во големо стампедо за време на верски настан во областа Хатрас во индиската држава Утар Прадеш, соопштија официјални претставници.
Полицијата истакна дека во тек е истрага за инцидентот, и дека се работи на идентификување на загинатите.
Стампедото се случило додека хинду проповедник им се обраќал на своите следбеници во специјално поставен шатор во селото Рати Банпур, објави Хиндустан Тајмс.
Според полицијата, се чини дека недостатокот на кислород на местото на собирот, во текот на многу топол и влажен ден, предизвикал непријатност кај луѓето кои присуствувале на верскиот настан и тие почнале панично да бегаат, што довело до стампедо.
Според еден од преживеаните, стампедото дошло на крајот на верскиот собир бидејќи сите брзале да го напуштат собирното место.
Јоги Адитјанат, главниот државен министер, изрази жалење за загубата на животи и сочувство до семејствата на загинатите. Министерот за одбрана Раџнат Синг изјави: „Под надзор на властите на државата, локалната администрација ја обезбедува сета можна помош“.
