Европската унија побара од американската компанија Епл да го прекине геоблокирањето, односно практиката на ограничување на содржината според географската локација на корисникот на нејзините медиумски услуги како Епл Стор (Apple Store), услугата за претплата за видео игри Епл Аркаде (Apple Arcade ) и стриминг на подкасти Епл Подкастс (Apple Podcasts).
Според Европската комисија, медиумските услуги на Епл незаконски ги дискриминираат европските клиенти врз основа на нивното место на живеење.
„Истрагата за геоблокирањето, спроведена заедно со мрежа на национални регулатори во Европската унија, откри дека медиумските услуги на Епл им дозволуваат на корисниците да користат само платежни картички издадени во земјите каде што ги регистрирале нивните сметки на Епл“, се вели во соопштението.
Продавницата за апликации, исто така, ги спречува корисниците да преземаат некои апликации понудени во други земји, покажа истрагата.
Според соопштението на Европската комисија, Епл сега има рок од еден месец да одговори на заклучоците од истрагата и да предложи решенија кои би спречиле геоблокирање.
