Европскиот парламент не успеа да ја изгласа забраната за пушење на отворено, предложена од Европската комисија во септември, која има за цел да ја намали смртноста од рак и да ги заштити луѓето од пасивно пушење.
Резолуцијата за забрана за пушење, првично поддржана од мнозинството европратеници, беше широко отфрлена по обидите на десничарските групи да ги исклучат новите тутунски производи од текстот на документот.
Во септември, Европската комисија предложи воведување на неколку зони - детски игралишта, отворените базени, забавни паркови, тераси во непосредна близина на образовните и здравствените институции и на постојките на јавниот превоз, кои ќе ги заштитат непушачите, особено децата и младите од пасивно пушење и ќе придонесат за намалување на бројот на смртни случаи од рак.
Социјалистите и демократите предложија забраната да не се однесува само на конвенционалните тутунски производи, туку и на испарувачите и електронските цигари.
Европскиот парламент со големо мнозинство гласаше со 378 гласа против резолуцијата за препораките за средини без чад - со само 152 „за“, а 26 воздржани.
Предлогот што произлезе од Комисијата беше заеднички претставен од Европската народна партија (ЕПП), Социјалистите и демократите (С&Д), Обнови ја Европа и Зелените/ЕФА. Но, и покрај заедничката поддршка од четири моќни политички групи, предлогот беше отфрлен по одобрувањето на амандманите поднесени од европските конзервативци и реформисти (ЕЦР).
По гласањето, Алесандра Морети, преговарач на С&Д за резолуцијата, ја критикуваше поддршката на ЕПП за амандманите на EЦР и „антинаучната позиција на десничарските групи“, наведувајќи дека тие „го спречија Парламентот да одобри резолуција што можеше да го заштити јавното здравје од чад и аеросоли, особено заштитувајќи ги ранливите групи како што се децата и бремените жени“.
Контроверзните амандмани бараа диференцијација во регулирањето на е-цигарите и другите загреани тутунски производи од традиционалниот тутун.
Ова би го променило влијанието на првичниот предлог, кој имаше за цел да ги прошири постојните правила со справување со ризиците што ги предизвикуваат вапените и тутунот.
Препораките на Комисијата вклучуваа проширување на забраната за пушење на отворено и покривање на иновативни производи кои не содржат никотин.
„Комисијата го игнорира фактот дека алтернативите на цигарите, како што е испарувањето, продолжуваат да се покажуваат како корисни за луѓето кои се обидуваат да се откажат од пушењето“, се вели во соопштението на ЕЦР.
Против текстот гласаа и „Патриоти за Европа“, бидејќи сметаа дека ЕУ нема надлежност за ова прашање, за кое верува дека е единствен домен на земјите-членки.
Друг оспорен аспект на резолуцијата беше проширувањето на забраните за пушење на отворени или полуотворени области - дефинирани како делумно покриени или затворени простори како покриви, балкони, тремови и дворови - поврзани со услужни објекти како ресторани, барови и кафулиња.
Тутунот е најголемиот ризик по здравјето што може да се избегне во земјите на ЕУ, убивајќи приближно 700.000 луѓе годишно, но сите земји имаат различни правила за пушење.
Исто така, познато е дека пасивното пушење предизвикува рак на белите дробови и срцеви заболувања кај непушачите.
Европската комисија, сепак, има за цел да создаде „генерација без тутун“ каде што помалку од 5 отсто од популацијата на ЕУќе користи тутун до 2040 година, како дел од нејзиниот план да го победи ракот.
