Апелациониот суд во Њујорк во четвртокот ја поништи пресудата од 23 година затвор на поранешниот холивудски продуцент Харви Вајнштајн за сексуален напад во 2020 година, случајот што го поттикна движењето #MeToo.
Во одлуката донесена со четири гласа за три против, судот пресуди дека судијата претседавач згрешил кога им дозволил сведочење од жени кои тврдеа дека Вајнштајн ги нападнал, иако тие не биле дел од обвинувањата против него.
Апелациониот суд, исто така, заклучил дека Вајнштајн немал фер судење и оти судијата ја зголемил својата грешка со тоа што дозволил Вајнштајн да биде испрашуван на начин што го прикажувал во „многу лоша светлина“.
„Лекот за овие безобразни грешки е ново судење“, одлучи судот.
Вајнштајн во февруари 2020 година беше осуден за сексуален напад на поранешна асистентка на продуцент во 2006 година.
Но 72-годишниот Вајнштајн ќе остане во затвор поради посебна пресуда за силување.
Во второто судење за силување и сексуален напад на една од четирите жени кои го обвинија во Лос Анџелес, тој беше прогласен за виновен во 2022 година и осуден на дополнителни 16 години.
Пресудата се сметаше за пресвртница за движењето #MeToo, во кое жените обвинија стотици мажи на забавните, медиумските, политичките и други полиња дека ги злоупотребуваат.
Вајнштајн беше еден од основачите на студиото Мирамакс, кое стои зад некои продукции наградени со Оскар, како што се „Палп Фикшн“ „Вљубениот Шекспир“ и други. Неговото истоимено филмско студио поднесе барање за стечај во март 2018 година.
Вајнштајн тврди дека е невин и дека секоја сексуална активност била одобрена од двете страни.
Повеќе од 80 жени излегоа со обвинувања за сексуален напад и недолично однесување против Вајнштајн, кои се протегаат неколку децении. Меѓу нив беа популарни актерки како Ешли Џад и Ума Турман.
