Генералниот секретар на НАТО, Јенс Столтенберг, по средбата со косовската претседателка Вјоса Османи во Приштина, изјави дека НАТО го поддржува дијалогот меѓу Косово и Србија, бидејќи мирот и безбедноста можат да се зачуваат само преку дијалог.
На заедничката прес-конференција со Османи, Столтенберг рече дека нападите врз војниците на КФОР во мај во Звечан, како и насилниот напад на 24 септември во Бањска, во кој беше убиен косовски полицаец, се недозволиви и дека сторителите мора да одговараат.
Тој рече дека по тој напад НАТО брзо реагирал и донел 1.000 војници на Косово како засилување за КФОР. Беше испратено и потешко оружје, а патролите на север беа засилени.
„Ќе направиме се што е неопходно за да се одржи безбедна средина и слободно движење за сите луѓе во Косово. За стабилноста во регионот одлучуваат сите страни кои треба да ја изберат дипломатијата наместо насилството и да ги одржат постоечките обврски“, нагласи Столтенберг.
Генералниот секретар на НАТО рече дека го поздравува последниот предлог на европскиот статут за формирање Заедница на општини со српско мнозинство на Косово, како важен и клучен чекор кон нормализација на односите меѓу Косово и Србија.
Османи изјави дека нападот во Бањска е чин на српска агресија врз Косово. Таа рече дека Србија наместо да ги испорача сторителите на тој напад на Косово, продолжува да организира такви групи.
Според неа, потребно е да се казни Србија за да не се повтори такво нешто.
„Доколку Србија не се соочи со какви било мерки за овие континуирани напади, тоа ќе биде нов поттик за повторно да го нападне Косово и да го дестабилизира регионот. Во овој контекст, клучната улога на НАТО и КФОР е во спречувањето на дестабилизацијата, не само на Косово, бидејќи Србија останува постојана закана за мирот и стабилноста во целиот наш регион“, посочи Османи.
Таа додаде дека Косово е подготвено да соработува со КФОР, бидејќи Косово и НАТО се на иста страна. Таа посочи дека членството во НАТО е од егзистенцијално значење за Косово.
Столтенберг се сретна и со премиерот Албин Курти, а ќе го посети и кампот на КФОР „Нотинг Хил“ кај Лепосавиќ, каде ќе се сретне со командантот на КФОР, генерал-мајор Озкан Улутас и ќе им се обрати на војниците.
Столтенберг е во Косово како дел од неговата балканска турнеја.
