Трет ден протести во Скопје: Демонстрантите влегоа во дворот од Владата

Илјадници граѓани излегоа вечерва на третиот ден од протестите во Скопје против францускиот предлог за отстранување на бугарското вето за почеток на преговорите на Северна Македонија со ЕУ. Дел од присутните околу 20 часот го пробија полицискиот кордон и влегоа во дворот од Владата. Скандираа и извикуваа „оставка, оставка“, „туѓото не го сакаме, своето не го даваме“, „Не за ЕУ“, „Ултиматум, не благодарам“.
Упатија барање до Владата да не го прифати францускиот предлог.

Ова е трет ден како се одржуваат протести во Скопје. Првите два, во саботата и неделата, минаа во мирна атмосфера. Вечерва дел од присутните фрлаа предмети кон зградата на Владата и беа во близок контакт со полицијата.

Присутните потоа се упатија кон Собранието каде исто така имаше близок контакт со полицискиот кордон, но не беа предизвикани посериозни инциденти. Лидерот на опозициската ВМРО-ДМНЕ, Христијан Мицкоски повика на масовни протести велејќи дека Владата планира да го прифати францускиот предлог. Тој претходно изјави дека на земјата не ѝ е потребна Европа ако нејзиниот народ треба да се асимилира.

„Ќе почекаме ако Европа не е подготвена да нè прими нас, цивилизираните Македонци, на цивилизиран и достоинствен начин таму каде што ни е местото, а тоа е во Европа, ќе почекаме кога ќе дојдат луѓе коишто го разбираат она коешто ние денеска сакаме да го кажеме, а тоа е Македонија пред и над сè, македонскиот идентитет пред и над сè“, истакна на првиот ден од протестите Мицкоски.

Според Мицкоски, предлогот ги содржи „сите бугарски барања во делот на јазикот, историјата и идентитетот“, по што тој повика на протести пред Владата на РСМ.

На 30 јуни до Владата на Република Северна Македонија, преку Министерството за надворешни работи, од француското претседателство пристигна нов предлог, по што започна консултативен процес најпрво во Владата и коалициските партнери, а потоа и со претседателот на државата, со Парламентот и со опозицијата, како и со граѓанскиот сектор.

Премиерот на Северна Македонија, Димитар Ковачевски, на прес-конференција во петокот изјави дека новиот предлог ги инкорпорира забелешките и јасно изградени ставови на македонската страна, предвидува јасно и недвосмислено прифаќање на македонскиот јазик како и тоа протоколот со Бугарија да не биде дел од преговарачката рамка.

Францускиот претседател Емануел Макрон, чие претседателство го изготви предлогот, смета дека со предлогот е пронајдено компромисно решение за двете страни.
Францускиот предлог е документ кој треба да доведе до отстранување на двегодишното вето од страна на Бугарија за интеграција на Северна Македонија во ЕУ.