Американскиот претседател Џо Бајден рано утринава го поздрави постигнатиот договор за размена на затвореници меѓу Израел и Хамас.
„Како претседател, немам поголем приоритет од обезбедувањето на безбедноста на Американците кои се држат како заложници ширум светот. Затоа, од најраните моменти на бруталниот напад на Хамас, мојот тим за национална безбедност и јас тесно соработувавме со регионалните партнери за да направиме се што е можно за да обезбедиме ослободување на нашите сограѓани“, се вели во соопштението од Белата куќа.
Бајден им се заблагодари на шеикот Тамим бин Хамад Ал-Тани од Катар и на претседателот Абдел-Фатах Ел-Сиси од Египет за нивното „критичко лидерство и партнерство“ во постигнувањето на договорот.
„Важно е сите аспекти од овој договор да бидат целосно спроведени“, додаде тој.
Израелската влада се согласи на договор за размена на затвореници со палестинската група Хамас рано во средата.
Според договорот со посредство на Катар, 50 Израелци кои ги држи Хамас ќе бидат ослободени во замена за 150 палестински затвореници од израелските затвори.
Договорот вклучува и четиридневна пауза во борбите и влез на 300 камиони натоварени со хуманитарна помош, вклучително и гориво, во Појасот Газа.
Израел започна немилосрдни воздушни и копнени напади во Појасот Газа по нападот на Хамас.
Бројот на загинати Палестинци од израелските напади врз Појасот Газа се искачи на 14.128, соопшти во вторникот Министерството за здравство во блокираната енклава.
„Жртвите вклучуваат над 5.840 деца и 3.920 жени“, се додава во соопштението на Министерството.
Во меѓувреме, според официјалните податоци, бројот на загинати во Израел е околу 1.200.
Илјадници згради, вклучувајќи болници, џамии и цркви, исто така се оштетени или уништени во воздушните и копнените напади на Израел врз опколената енклава.
