Турскиот претседател Реџеп Таип Ердоган изјави дека наредните денови ќе има телефонски разговор со рускиот претседател Владимир Путин за иницијативата за извозот на жито.
„Ќе имаме телефонски разговор со Путин за два-три дена“, рече Ердоган во интервјуто емитувано во живо на турските канали НТВ и Стар ТВ.
Ердоган, исто така, истакна дека светот ги цени посредничките напори на Туркије помеѓу Русија и Украина.
„За тоа веќе сме признати во светот. Светот зборува за овој успех на Туркије“, додаде тој.
Туркије, Обединетите нации (ОН), Русија и Украина во јули минатата година во Истанбул потпишаа договор за продолжување на извозот на жито од трите украински пристаништа на Црно Море што беше запрен по почетокот на руско-украинската војна во февруари 2022 година. Ердоган најави продолжување на договорот во саботата, еден ден пред да истече.
Турскиот претседател потсети и на понудата на Путин бесплатно да прати жито во сиромашните држави.
„Заедно (со Путин) ќе ги преземеме нашите чекори и во оваа област“, рече Ердоган.
Тој додаде дека Анкара е решена и да испраќа руско ѓубриво во помалку развиените земји.
„Потребно е ѓубриво. Ќе ги снабдуваме. Ќе го испратиме (ѓубривото) на светските пазари и неразвиените земји и ќе се обидеме да ги ослободиме“, рече тој.
Нагласувајќи дека Туркије нема да биде страна во ниту една војна и секогаш ќе биде на страната на мирот, Ердоган рече: „Впрочем, ова е чекорот што го направивме во руско-украинската војна“.
Земјотреси во Туркије
Во врска со силните земјотреси од минатиот месец во јужниот регион на Туркије, Ердоган рече дека тие прават напори да ги „залечат раните“ на граѓаните погодени од земјотресот.
На 6 февруари, земјотреси со јачина од 7,7 и 7,6 степени по Рихтер погодија 11 турски провинции - Адана, Адијаман, Дијарбакир, Елазиг, Хатај, Газиантеп, Кахраманмараш, Килис, Малатија, Османије и Шанлиурфа -- одземајќи животи на над 50.000 луѓе.
Повеќе од 13,5 милиони луѓе во Туркије се погодени од земјотресите, како и многу други во северна Сирија.
Ердоган вети дека ќе ги реконструира регионите погодени од земјотресот, велејќи: „Како што ветивме, (во четврток) почнуваме да ги поставуваме темелите. Се надевам дека ќе успееме да ги завршиме постојаните куќи за една година.
Претседателот рече дека 302 осомничени биле уапсени како дел од истрагата спроведена по земјотресите.
„Ќе ги следиме (истрагите) внимателно. Оние кои нема да ги исполнат своите одговорности ќе одговараат. Нема спас“, додаде тој.
Првиот електричен автомобил во Туркије
Во врска со првиот автохтон електричен автомобил Тогг во Туркије, Ердоган рече дека од крајот на овој месец, Tогг ќе ги збогати улиците.
„Речиси 80.000 нарачки за автомобилот се примени до денес“, рече Ердоган.
Претходните нарачки за TOGG T10X ќе бидат преземени онлајн од 16-27 март, а испораките ќе започнат кон крајот на март.
Цената на стандардниот модел T10X започнува од 953.000 турски лири (околу 50.200 долари) до 1.055 милиони лири (околу 55.600 долари), додека моделот со подолг домет е со цена од 1.215 милиони лири (околу 64.000 долари).
Ердоган рече дека целта на производството на Tогг е 20.000 примероци оваа година, додавајќи: „Се надеваме дека ќе произведеме еден милион Тогг автомобили до 2030 година“.
Во интервјуто, турскиот претседател Ердоган по повод почнувањето на месецот на постот Рамазан упати честитки до муслиманите ширум светот.
