Израелскиот министер за надворешни работи Гидеон Сар во понеделникот изјави дека е постигнат напредок во преговорите за прекин на огнот во Либан.
„Постигнат е напредок во разговорите за прекин на огнот во Либан, а главниот предизвик е спроведувањето на договореното“, рече Сар на прес-конференција, пренесе израелскиот канал 12.
Израелскиот министер рече дека Русија може да помогне да се спречи повторното вооружување на Хезболах преку нејзиното воено присуство во Сирија.
„Ракетните капацитети на Хезболах се сериозно оштетени и во голема мера уништени, но Хезболах како организација сè уште не е уништена“, додаде тој.
Портпаролот на Хезболах, Мохамад Афиф, во понеделникот ги оспори тврдењата на Израел за уништување на неговите ракетни резерви, велејќи дека борците на групата се подготвени за долга војна со Израел.
Тој нагласи дека Хезболах не добил никаков официјален предлог за прекин на огнот со Израел.
Тел Авив започна голема воздушна кампања во Либан против, како што вели, цели на Хезболах по едногодишната прекугранична војна меѓу Израел и либанската група Хезболах што избувна по бруталната израелска офанзива на Појасот Газа.
Израел го прошири конфликтот на 1 октомври оваа година со копнениот напад врз јужен Либан. Речиси 3.200 луѓе се убиени, а повеќе од 13.800 се повредени во израелските напади од октомври минатата година, според либанските здравствени власти.
