Бројни експлозии одекнаа во Бејрут, главниот град на Либан, веднаш по обраќањето на израелскиот премиер Бенјамин Нетанјаху на Генералното собрание на Обединетите нации (ГСОН) во Њујорк.
Густ чад можеше да се забележи во јужниот дел на Бејрут по десетина експлозии.
Како што јави либанската новинска агенција ННА, квартот Хурејк во регионот Дахија, во јужниот дел од Бејрут, бил цел на воздушни напади.
Се додава дека израелски воени авиони бомбардирале многу објекти во Дахија.
Во регионот беа испратени многу амбулантни возила и тимови за цивилна одбрана.
Портпаролот на израелската армија Даниел Хагари објави дека цел на авионите биле штабот на Хезболах во регионот Дахија.
Израелските медиуми јавуваат дека цел на израелската армија бил генералниот секретар на Хезболах Хасан Насрала.
Според израелското армиско радио, армијата истражува дали Насрала бил присутен на локацијата која била цел на израелските авиони, додавајќи дека во нападот биле користени „бункер-бомби“, наменети за уништување бункери.
Израелската телевизија Канал13 објави дека официјален Тел Авив го известил Вашингтон дека ќе го нападне бејрутскиот кварт Дахија.
Телевизијата Ал Манар, која е блиска до Хезболах, објави дека во нападот биле уништени четири згради.
Според Једиот Ахронот, друг израелски дневен весник, премиерот на земјата Бенјамин Нетанјаху ненадејно ја напуштил прес-конференцијата во седиштето на ОН во Њујорк во петокот.
Заминувањето уследи по брифингот од неговиот воен секретар за воздушните напади во Бејрут, според весникот.
Либанскиот премиер Наџиб Микати, пак, рече дека информациите укажуваат на „голем број жртви“ во нападот.
Израелската армија, која од 8 октомври минатата година ги продолжува контролираните судири со Хезболах, од 23 септември извршила стотици воздушни напади врз градовите на југот на Либан, како и врз регионите Бека и Баалбек.
Според либанските власти, 773 лица загинале во воздушните напади, додека речиси 150.000 биле раселени поради бомбардирањето.
