Израелскиот премиер Бенјамин Нетанјаху во понеделникот ги негираше информациите за постигнување договор за размена на затвореници со Хамас.
Израелските медиуми претходно сугерираа дека е постигнат договор за привремен прекин на огнот меѓу Израел и Хамас.
„Извештаите за договор не се точни и вклучуваат услови кои не се прифатливи за Израел“, се вели во соопштението од канцеларијата на Нетанјаху. „Продолжуваме до целосна победа“, се додава.
Израелскиот Канал 13 претходно објави дека Тел Авив се согласил на хуманитарен договор, кој вклучува ослободување на жени и постари и повредени луѓе кои ги држи Хамас, но не ги вклучува војниците или младите кои ги држи групата.
Израел за возврат ќе ослободи стотици палестински затвореници од израелските затвори, вклучително и оние кои се осудени за убиство на Израелци, се вели во извештајот.
Според телевизијата, Израел ќе ги паузира борбите до два или повеќе месеци, без обврска да стави крај на војната.
Сè уште нема коментар од Хамас за изјавата на Нетанјаху.
Катар во понеделникот го наведе напредокот во разговорите за прекин на огнот во Појасот Газа.
Портпаролот на Советот за национална безбедност на САД, Џон Кирби, исто така, ги опиша тековните разговори како „конструктивни“.
Тој остана на ставот дека, иако е постигнат напредок, нема „договор што е на маса и непосредно подготвен да биде објавен“.
Се верува дека Хамас држи речиси 136 Израелци по неговиот прекуграничен напад на 7 октомври.
Израел започна смртоносна офанзива на Појасот Газа од 7 октомври, при што загинаа најмалку 26.637 Палестинци, а беа повредени 65.387.
Се верува дека во нападот на Хамас биле убиени речиси 1.200 Израелци. Израелската офанзива остави 85 отсто од населението на Газа внатрешно раселено поради акутен недостиг на храна, чиста вода и лекови, додека 60 отсто од инфраструктурата на енклавата е оштетена или уништена, според ОН.
