Русија денес потврди дека соборила 45 украински беспилотни летала за време на нападот врз повеќе региони во земјата во текот на ноќта, вклучително и главниот град Москва.
Во соопштението на Министерството за одбрана се вели дека 11 беспилотни летала лансирани од Украина биле соборени над регионот на Москва, а три над соседниот регион Калуга.
Министерството соопшти дека 23 беспилотни летала биле соборени над пограничниот регион Брајанск, а осум биле „уништени“ над регионите Белгород и Курск, кои исто така се во непосредна близина на Украина.
Градоначалникот на Москва, Сергеј Собјанин, изјави дека нема жртви или материјална штета, но рече дека нападот врз главниот град е „еден од најголемите обиди за напад на Москва со беспилотни летала досега“.
Украинските власти сè уште не ги коментираа овие тврдења, иако украинскиот Генералштаб тврди дека погодил противракетен одбранбен систем С-300 во близина на градот Новошахтинск во Ростов.
Гувернерот на Ростов, Василиј Голубев, на Телеграм изјави дека во западниот дел на регионот бил соборен проектил и дека според прелиминарните информации нема жртви или материјална штета.
