Може ли во иднина вештачката интелигенција да лансира нуклеарна бомба во земјата која поседува вакво оружје или во трети земји потенцијално предизвикувајќи нова светска војна? Двопартиска група американски законодавци претстави Предлог-закон за забрана вештачката интелигенција да смее да донесува одлуки за лансирање во рамките на процесот за нуклеарна команда и контрола на Соединетите Американски Држави (САД).
Предлог-законот беше претставен истовремено и во Претставничкиот дом и во Сенатот. Пратениците Тед Лиу, Доналд Бејер Џуниор и Кен Бак го претставија Предлог-законот во Претставничкиот дом, додека сенаторот Едвард Марки им се придружи за негово претставување во Сенатот.
Блокирањето на нуклеарното лансирање преку Актот за автономната вештачка интелигенција ќе ја кодифицира постојната политика на Пентагон, која наложува човечка акција за иницирање на нуклеарно лансирање и ќе забрани федерални средства да се користат за извршување на какво било нуклеарно лансирање од автоматизирани системи. Нуклеарните лансирања ќе бараат „значајна човечка контрола“ според Предлог-законот.
„АИ-технологијата се развива со исклучително брзо темпо“, рече Лиу во заедничката изјава. „Додека се обидуваме да се носиме со темпото со кое забрзано се развива вештачката интелигенција, иднината на вештачката интелигенција и нејзината улога во општеството остануваат нејасни. Наша работа е како членови на Конгресот да имаме одговорно предвидување кога станува збор за заштита на идните генерации од потенцијално разорни последици.“
Во краткиот преглед на Предлог-законот објавен од законодавците се наведува дека вештачката интелигенција „не е замена за човечката контрола и правното расудување“, нагласувајќи ја потребата од „обезбедување на овие заштитни огради со цел заштита на идните генерации од потенцијално катастрофални последици и осигурување дека нема иднина во која робот може да лансира нуклеарно оружје“.
