Од памтивек, луѓето се обидуваат да осмислат ефективни техники за управување со гневот и незадоволството. Една неодамнешна студија на јапонски научници откри ослободувачки ефект од запишување на сопствената реакција на негативен настан на парче хартија.
Дури и римскиот филозоф Сенека верувал дека сопствениот гнев веројатно ќе му предизвика повеќе штета отколку нечија неправда, па во своето дело „Де Ира“ (За гневот) во 45 година п.н.е., дал совет како да го избегнете, пишува Гардијан.
Меѓу посовремените методи препорачани од психолозите се физичките активности, на пример возење собен велосипед или удирање во боксерска вреќа.
Новото истражување сугерира дека дури и скромниот секач за хартија може да ви помогне откако нешто или некој ве налутил.
Едноставен метод за ублажување на гневот
Студијата на јапонските научници го откри ослободувачкиот ефект од запишувањето на реакцијата на негативен настан на лист хартија, кој потоа треба да се искине, да се стутка во топка и на крајот да се фрли во корпа за отпадоци.
„Очекувавме дека нашиот метод кај испитаниците ќе успее донекаде да го потисне нивниот гнев. Сепак, бевме многу изненадени од фактот дека гневот кај поединците речиси целосно исчезна“, изјави Нобујуки Каваи, шеф на истражувањето на Универзитетот Нагоја.
Студијата, чии резултати беа објавени во списанието Scientific Reports on Nature, се заснова на истражување за поврзаноста на пишаниот збор и намалувањето на гневот и на студии кои покажуваат како интеракцијата со физички предмети може да го контролира расположението на човекот.
Научниците дадоа пример - оние кои сакаат да му се одмаздат на поранешниот партнер можат да запалат писма или да ги уништат неговите подароци.
Тие веруваат дека резултатот би можел да биде поврзан со психолошкиот феномен на „магичната заразна хеуристика“ каде што луѓето се убедени дека дејствијата што ги преземале врз предмет поврзан со одредена личност можат да влијаат на самиот поединец.
Во овој случај, „ослободувањето“ од негативниот физички ентитет, т.е. листот хартија, резултира со исчезнување на првобитната емоција. Феноменот се заснова на верувањето дека суштината на поединецот може да се манифестира преку неговите физички имоти.
Фрлените хартии со напишани негативни емоции го намалија гневот
Како дел од студијата, од педесет студенти беше побарано да го запишат своето кратко мислење за важно општествено прашање, на пр. дали пушењето треба да се забрани на јавни места.
Експертите намерно ги оценија нивните дела со ниски оценки, а оценките се однесуваа на нивната интелигенција, интерес, пријателство, логично расудување и рационално одлучување. За да ја засилат својата намера, рецензентите додадоа навредливи коментари како: „Не можам да верувам дека образована личност може да размислува вака. Се надевам дека оваа личност ќе успее да научи нешто додека студира на овој универзитет“.
По добивањето на резултатите, учесниците ги запишаа своите лути мисли за негативните повратни информации на парче хартија.
На една група и беше кажано да ја стуткаат хартијата и да ја фрлат во корпата за отпадоци или да ја чуваат во папка на своето биро.
На друга група и беше кажано да ја искине хартијата или да ја стави во пластична кутија.
Нивото на гнев кај поединците кои ги фрлале своите хартии во ѓубре или ги искинале целосно исчезнало, додека групата студенти кои чувале печатена копија од хартијата чувствувале само малку помал гнев.
Античка јапонска традиција - хакидашисара
Откритието на јапонските психолози, исто така, може да фрли светлина врз потеклото на јапонската културна традиција позната како „хакидашисара“ (хакидаши и сара се зборови што се однесуваат на јадење или чинија).
Традицијата се практикува во храмот Хијоши во Кијосу, недалеку од Нагоја, а манифестацијата хакидашисар се одржува еднаш годишно. Посетителите потоа кршат мали дискови кои го претставуваат или отелотворуваат она што ги лути, по што чувствуваат олеснување.
