Шпанката Марија Брањас Морера, која беше најстарата личност на светот, почина на 117-годишна возраст, соопшти денеска нејзиното семејство.
Нејзиното семејство на социјалните мрежи објави дека 117-годишната жена починала во Олот, Шпанија.
„Марија Брањас не напушти. Почина во сон, мирно и без болки, како што сакаше. Секогаш ќе ја паметиме по нејзините совети и добрина“, рекоа од семејството.
Брањас, која живееше во дом за стари лица во североисточниот шпански град Олот во последните две децении, минатиот вторник објави дека се чувствува „слабо“.
„Тој момент е близу. Не плачете, не сакам солзи. И пред се, не тагувајте за мене. Каде и да одам ќе бидам среќна“, објави тогаш таа на профилот што го води нејзиното семејство.
Гинисовата книга на рекорди официјално ѝ го призна статусот на најстара личност во светот во јануари 2023 година, по смртта на француската калуѓерка Лусил Рандон на 118-годишна возраст.
Брањас, која го преживеа грипот од 1918 година, Првата и Втората светска војна и Шпанската граѓанска војна, се зарази со КОВИД-19 во 2020 година само неколку недели откако го прослави својот 113-ти роденден и беше затворена во својата соба во домот, но целосно закрепна.
Нејзината најмлада ќерка Роза Морет еднаш ја припиша долговечноста на нејзината мајка на генетиката.
„Никогаш не била во болница, никогаш не скршила ниту една коска, добро е, нема болки“, рече Морет во 2023 година.
Брањас е родена во Сан Франциско на 4 март 1907 година, кратко откако нејзиното семејство се преселило во Соединетите држави од Мексико. Целото семејство решило да се врати во родната Шпанија во 1915 година, бидејќи била во тек Првата светска војна, што го отежнувало патувањето со брод преку Атлантикот.
По смртта на Мари Брањас, најстарата соба на светот стана Јапонката Томико Итока, која е родена на 23 мај 1908 година и има 116 години.
Најстарата потврдена личност што некогаш живеела била Французинката Жан Луиз Калмент, која починала во 1997 година на 122 години и 164 дена.
