Европската комисија предложи нови правила според кои производителите кои ставаат еколошки ознаки на своите производи ќе треба да обезбедат докази за да ги оправдаат тие ознаки. Предлогот за нови правила има за цел да ја спречи практиката на манипулативен „зелен“ маркетинг.
„Секаде наоѓаме тврдења за прифатливост за животната средина: маици кои не се штетни за океанот, банани со неутрална содржина на јаглерод, сокови кои не им штетат на пчелите, испорака со 100 отсто компензација за емисиите на ЦО2, често без никакви докази или оправдување“, изјави потпретседателот на Комисијата Франс Тимерманс.
Тој додаде дека таквата практика компаниите кои навистина произведуваат одржливи производи ги става во неповолна положба.
„Многу Европејци сакаат да придонесат за поодржлив свет со своите купувања, и затоа е важно да им веруваат на тврдењата. Со овој предлог, на потрошувачите им даваме поголема доверба дека нешто што се продава како зелено навистина е зелено“, вели Тимерманс.
Според предлог директивата, која мора да биде потврдена од Советот на ЕУ и Европскиот парламент, компаниите кои ставаат еколошки ознаки на своите производи и услуги ќе мора да ги поткрепат овие тврдења со научни докази и ќе треба да можат да бидат независно потврдени.
Потврдата ќе ја врши овластено тело за верификација и дури потоа ознаките ќе можат да бидат ставени на производите.
Предлогот се фокусира на експлицитни тврдења, како што се „маичка направена од рециклирани пластични шишиња“, „превоз со компензација за емисија на ЦО2“, „30 отсто рециклирана пластична амбалажа“ или „заштита од сонце погодна за океанот“.
Во истражувањето спроведено од Комисијата во 2020 година, беше откриено дека 53,3 отсто од испитаните тврдења за прифатливоста на животната средина во ЕУ биле нејасни, погрешни или неосновани, а 40 отсто биле неосновани.
Ова се должи на недостатокот на заеднички правила за компаниите кои даваат доброволни еколошки барања, што доведува до манипулативен зелен маркетинг и создава нерамномерен терен за игра на пазарот на ЕУ на штета на навистина одржливите компании.
