Турскиот министер за надворешни работи Хакан Фидан го осуди нападот на Израел врз палестинскиот град Рафах, јужна Газа и го оцени како неприфатлив во разговор со државниот секретар на САД, Антони Блинкен.
Според турски дипломатски извори, зборувајќи со Блинкен во средата, Фидан ја истакна важноста од воспоставување постојан прекин на огнот во Газа што е можно поскоро.
Турскиот шеф на дипломатијата, исто така, подвлече дека треба да се отстранат пречките за хуманитарната помош да стигне до регионот.
Според изворите, на дневен ред била и најновата ситуација во Украина.
Израелските тенкови напредуваа понатаму во Рафах во вторникот, продирајќи во станбените области на јужниот пограничен град во Газа каде над милион луѓе побараа засолниште.
Израел им нареди на цивилите да се евакуираат од делови на Рафах, а УНРВА, главната агенција за помош на Обединетите нации во Газа, проценува дека околу 450.000 луѓе го напуштиле градот од 6 мај. Повеќе од еден милион цивили побарале засолниште таму.
Последниве денови се забележува ескалација на борбите низ различни делови на опколената енклава, вклучително и во северниот регион, каде што израелската војска повторно се вклучи во областите за кои претходно се тврдеше дека се исчистени од присуството на Хамас.
Во северниот дел на Газа, во израелски воздушен напад врз куќа во населбата Шеик Радван доцна во вторникот загинаа четири лица, а неколку беа ранети, соопштија медицинските лица.
Во населбата Зејтун во Газа, израелски булдожери демолираа куќи за да направат нов пат за тенкови.
Бројот на палестински жртви од 7 октомври сега надмина 35.000. Голем дел од населението во Газа е на работ на глад, велат ОН, и очајно бара гориво и други основни залихи, како што се лекови.
