Хамас нема да прифати договор што не води до траен прекин на огнот и целосно повлекување на Израел од Газа, изјави денеска членот на политичкото биро на Хамас, Гази Хамад.
Во изјава за Си-Ен-Ен, тој додаде дека предлогот за кој моментално се дискутира не е прифатлив.
„Ставот на Хамас е дека документот од 2 јули е основата прифатена од посредниците и ние не прифаќаме никаков договор што го игнорира прашањето за траен прекин на огнот и целосно повлекување на израелската армија“, рече Гази Хамад.
Тој се осврна на одговорот на Хамас на предлогот што го претстави американскиот претседател Џозеф Бајден во мај, повикувајќи на прекин на огнот во Газа и повлекување на Израел.
„Она што во моментов се нуди е делумно и недоволно и не ги исполнува барањата на Хамас“, додаде претставникот на Хамас.
САД и Израел во последните денови разговараа за едномесечен прекин на огнот во замена за ослободување на некои заложници, изјавија претходно за Си-Ен-Ен два извори запознаени со ова прашање.
„Израелскиот премиер Бенјамин Нетанјаху продолжува да одбива да даде какви било конкретни гаранции за патот кон поширок договор за ставање крај на војната“, изјави за Си-Ен-Ен оваа недела извор запознаен со разговорите.
Директорот на американската Централна разузнавачка агенција (ЦИА), Вилијам Барнс, вчера најави дека ќе му предложи на Хамас нов договор за прекин на огнот во Појасот Газа, кој вклучува 28-дневна пауза во конфликтот во кој осум заложници на палестинската милитантна група треба да биде ослободена во замена за ослободување на десетици Палестинци од израелските затвори.
Ова го објави американскиот портал Аксиос, повикувајќи се на тројца неименувани израелски функционери, наведувајќи дека Барнс разговарал за тоа на состанокот во Доха во неделата со неговите колеги од Израел и Катар.
