Израел вчера официјално ги информираше Обединетите нации (ОН) за неговата одлука да се повлече од договорот со Агенцијата на Обединетите нации за помош на палестинските бегалци на Блискиот Исток (UNRWA), наведувајќи „загриженост за безбедноста“.
Во писмото упатено до претседателот на Генералното собрание на ОН, Филемон Јанг, израелското Министерство за надворешни работи изјави дека повлекувањето се однесува на договорот од 1967 година во врска со операциите на УНРВА за поддршка на палестинските бегалци.
Повлекувањето ќе стапи на сила по тримесечен преоден рок.
Израел нагласи дека сепак ќе соработува со меѓународните партнери, вклучително и другите агенции на ОН, за да се осигури дека хуманитарната помош ќе стигне до цивилите во Газа.
Сепак, Министерството ја истакна важноста од заштита на безбедноста на Израел, сигнализирајќи дека олеснувањето на помошта не треба да ја загрози неговата безбедност.
Во соопштението се додава дека Израел очекува Обединетите нации да придонесат во овие напори, усогласувајќи ја хуманитарната поддршка со регионалните безбедносни потреби.
Писмото беше испратено и до генералниот секретар на ОН, Антонио Гутереш.
Дани Данон, амбасадорот на Израел во ОН, исто така на социјалната мрежа X напиша: „И покрај огромните докази што ги доставивме до ОН кои ја потврдуваат инфилтрацијата на Хамас во УНРВА, ОН не направија ништо за да ја поправат ситуацијата“.
„Државата Израел ќе продолжи да соработува со хуманитарните организации, но не и со организации кои промовираат тероризам против нас“, додаде тој.
