Израелскиот премиер Бенјамин Нетанјаху ги отфрли меѓународните барања за траен договор со Палестинците и изјави дека се противи на меѓународните еднострани позиции за признавање на палестинска држава.
„Јасно го кажав мојот став против наметнувањето на палестинска држава на Израел во Кабинетот за безбедност“, рече Нетанјаху на социјалната мрежа Х.
Истакнувајќи дека тие категорично ги отфрлаат „меѓународните диктати“ во однос на траен договор со Палестинците, Нетанјаху нагласи дека тоа може да се постигне само со директни преговори меѓу страните без предуслови.
Изјавувајќи дека Израел ќе продолжи со својот став против меѓународните еднострани чекори кон признавањето на Палестина, Нетанјаху тврди дека „таков чекор по нападот на 7 октомври значи наградување на тероризмот“.
„Вашингтон пост“ објави дека САД и некои арапски земји работат на план кој вклучува временска рамка за формирање на палестинска држава.
Се вели дека САД и некои арапски земји брзаат да го финализираат деталниот и сеопфатен план за долгорочен мир меѓу Израел и Палестина.
Во извештајот, заснован на американски и арапски претставници, се вели дека планот би можел да биде објавен во следните неколку недели.
Од прекуграничниот напад на палестинската група Хамас на 7 октомври, во кој загинаа околу 1.200 луѓе, израелската офанзива во Газа уби повеќе од 28.600 луѓе и предизвика масовно уништување и недостиг на залихи.
На 26 јануари, по тужбата за геноцид поднесена од Јужноафриканската Република, Меѓународниот суд на правдата одлучи дека Израел мора да се воздржи од какви било дејствија поврзани со убиства, напади и уништување на жителите на Појасот Газа и да ги преземе сите мерки за да спречи геноцид.
Според Обединетите нации, поради израелската офанзива, 85 отсто од населението на Појасот Газа е внатрешно раселено и се соочува со акутен недостиг на храна, чиста вода и лекови, додека 60 отсто од инфраструктурата на енклавата е оштетена или уништена.
