Јасмина Гуерда од Канцеларијата на Обединетите нации (ОН) за координација на хуманитарни прашања (OCHA), изјави дека од 7 октомври 2023 година во Газа се убиени повеќе од 200 хуманитарни работници и дека Газа повеќе не е безбедно подрачје за никого.
Гуерда на неделната прес-конференција на Кабинетот на ОН во Женева ги сподели своите искуства по тримесечната служба во Газа, која е под интензивни израелски напади.
Наведувајќи дека ситуацијата во Газа е толку лоша што не може да се мери со бројки, Гуерда рече дека многу луѓе се раселени, а жителите на блокираната енклава не можат да ги задоволат своите потреби за храна, засолниште, здравствени и други потреби.
„Во Газа слушнав и видов приказни од прва рака кои ќе ме прогонуваат до крајот на мојот живот“, рече Гуерда.
Повеќе од 37.500 Палестинци се убиени во израелските неселективни бомбардирања и гранатирања на цивилни населби, училишта, верски објекти и болници на Појасот Газа од 7 октомври минатата година, од кои повеќето се жени и деца, а околу 86.000 се ранети, објавија здравствените власти на палестинската енклава.
Израел е обвинет за геноцид пред Меѓународниот суд на правдата, чија последна одлука им нареди на израелските власти веднаш да ја прекинат воената операција во јужниот град Рафа.
И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.