Детскиот фонд на Обединетите нации (УНИЦЕФ) во четвртокот соопшти дека бројот на убиени деца на Западниот Брег достигнал невидени нивоа и нивното страдање не смее да избледува во позадината на актуелниот конфликт.
„Оваа година беше најсмртоносната година за децата на Западниот Брег, вклучувајќи го и Источен Ерусалим, со насилство поврзано со конфликти кои достигна невидено ниво“, рече регионалната директорка на УНИЦЕФ за Блискиот Исток и Северна Африка, Адел Ходр.
Таа истакна дека „83 деца се убиени во изминатите дванаесет недели - повеќе од двојно од бројот на убиени деца во цела 2022 година, во услови на зголемени воени операции и операции за спроведување на законот“.
Ходр, исто така, рече дека „повеќе од 576 деца се повредени, а други, наводно, се приведени. Понатаму, Западниот Брег е силно погоден од ограничувањата за движење и пристап“.
„Додека светот со ужас ја следи ситуацијата во Појасот Газа, децата на Западниот Брег доживуваат свој кошмар. Да се живее со речиси постојано чувство на страв и тага е, за жал, премногу вообичаено за погодените деца“, рече таа.
„Страдањето на децата на Западниот Брег, вклучувајќи го и Источен Ерусалим, не смее да избледи во позадината на сегашниот конфликт - тоа е дел од него“, додаде таа.
