Над13.000 луѓе се убиени, а речиси 1,7 милиони луѓе се раселени во Појасот Газа од 7 октомври, соопшти во вторникот Агенцијата на ОН за палестински бегалци (УНРВА).
Во соопштението, агенцијата вели дека 75 отсто од убиените, наводно, се деца, жени и постари лица.
„Од 19. ноември, речиси 930.000 внатрешно раселени лица сега се засолнети во 156 инсталации на УНРВА низ сите пет провинции на Појасот Газа, вклучително и на север“, се вели во извештајот.
„Речиси 770.000 внатрешно раселени лица се засолнети во 99 објекти во областите Мидл, Кан Јунис и Рафах“, се додава во соопштението.
Агенцијата на ОН исто така соопшти дека „речиси 160.000 внатрешно раселени лица биле засолнети во 57 училишта на УНРВА во северниот дел и областите на Газа од 12. октомври 2023 година, пред да бидат издадени наредби за евакуација од страна на израелските власти“.
„УНРВА не може да пристапи до овие засолништа за да им помогне или да ги заштити внатрешно раселените лица и нема информации за нивните потреби и услови“, се додава.
Израел започна немилосрдни воздушни и копнени напади во Појасот Газа по прекуграничниот напад на палестинската група Хамас на 7 октомври.
Властите во Газа во понеделникот соопштија дека бројот на жртвите од тековните израелски напади врз енклавата од 7 октомври се искачи на над 13.300, вклучувајќи 5.600 деца и 3.550 жени.
Во меѓувреме, бројот на загинати во Израел е околу 1.200, според официјалните бројки.
