Русија со беспилотни летала и балистички ракети изведе напади на Киев, главниот град на Украина, како и регионите на Миколаевска, Одеска и Черкаска Област.
Командата на украинските воздухопловни сили соопшти дека синоќа Русија нападнала украинска територија со две балистички ракети Искандер-М и 16 беспилотни летала од типот Шахед.
Соопштено е дека 15 беспилотни летала биле соборени од воздухопловните сили во регионите на Киев, Миколаевска, Одеска и Черкаска Област.
Шефот на воената управа на градот Киев, Сергеј Попко, изјави дека беспилотните летала биле пратени во Киев од областа Курск во Русија.
„Беспилотните летала поминаа низ регионите Суми и Черкаси и влегоа во Киев, а од југозапад беа пресретнати од силите за противвоздушна одбрана. Сите непријателски цели беа уништени“, рече Попко.
Тој потврди дека нема повредени, а не е предизвикана материјална штета.
Началникот на воената управа на Одеската Област изјави дека биле оштетени куќи и дека во нападот со беспилотни летала биле повредени седум лица, меѓу кои две деца.
